Relaciona cu e medida di 12.6 %
ORANJESTAD (AAN): Riba Diaranzon, Hues a dicta sentencia den e caso sumario cu Gobierno a cuminsa dia 11 Februari 2022 contra e sindicatonan SIMAR y SEPPA, pa prohibi nan di tene nan accion contra e medida di 12.6% cu Gobierno a introduci. E accion di e sindicatonan ta consisti di reduccion di oranan di les pa mucha.
Tabatin un sentencia intermedio di Hues, caminda Hues ta pone presion riba Gobierno pa mustra un medida structural pa reemplaza e medida di 12.6 % cu mas bien ta un medida cu Gobierno a bin ta alarga. Hues a pidi Gobierno pa presenta na Hues nan intension di presenta na Hulanda un medida structural cu e fin pa baha e gasto grandi di personal cu Gobierno tin.
E sentencia intermedio tabata 2 Maart 2022 caminda Hues a mustra cu durante tratamento di e caso, el a intercambia di pensamento cu Werleman di Finanzas, caminda entre otro a papia riba introduci VUT pa asina baha e personal di Gobierno. Di parti di Gobierno a worde mustra cu no por bin cu medida asina liher. Hues den su evaluacion ta mustra cu e 12.6% ta un medida temporal cu tabata planea pa 6 luna pero te ainda ta vigente.
Hues ta haya cu for di 2 aña pasa, Gobierno mester a cuminsa cu alternativanan structural pa baha e gasto di Gobierno, cual no a sosode.
Mester presenta solucion structural: Hues a bisa cu e kier pa Gobierno presenta un plan structural y no temporal na Hulanda, con ta bay baha e gastonan di personal di Gobierno. Hues kier mira solucion structural y no temporal pa reemplaza e 12.6 % cu Gobierno a keda mantene.
Hues a mustra cu sindicatonan SIMAR y SEPPA a bisa durante tratamento di e caso, cu nan lo no bay den accion tanten cu no tin un sentencia. Hues ta kere cu sindicatonan lo mantene e palabracion aki.
Hues a orden Gobierno pa dia 16 di Maart 2022 den Corte presenta e medidanan structural cu ta bay tuma. E sindicatonan SIMAR y SEPPA den Corte lo haya copia di esaki y nan lo tin 2 siman di tempo pa entrega nan reaccion riba esaki na Corte.
Entretanto esaki a sosode y Hues a notifica Gobierno y e sindicatonan SIMAR y SEPPA cu ayera tin sentencia.
Evaluacion di Hues: Hues den su evaluacion di e caso ta bati riba dede di Gobierno mustrando cu den Corte Gobierno ta mustra cu e alternativa structural ta e reduccion di e empleadonan di Gobierno mientras cu e proposicion cu Gobierno a haci na CAft ta completamente diferente. Den e proposicion Gobierno ta mantene e reduccion di pago di vacacion (vakantie-uitkering) y pago di 7.6 %.
E reduccion di 5 % riba salario ta disparce pero di otro banda entre otro spaarmento of limitacionnan ta worde poni riba diferente beneficionan di e empleado di Gobierno entre otro e dianan ATV y pago di overtime.
Accion no por: Hues ta mustra cu Gobierno no por riba termino cortico haci cambionan cu tin palabra cu Hulanda, sin cu esaki lo tin consecuencianan financiero hopi serio pa Gobierno y henter comunidad di Aruba.
Hues ta sigui mustra cu Gobierno di Aruba no por cumpli cu su obligacionnan sin e sosten financiero cu e ta hayando for di Hulanda, caminda actualmente tin e medida di 12.6 % como condicion.
Ta na interes di Gobierno y comunidad di Aruba pa no bay complace cu e deseonan di e sindicatonan SIMAR y SEPPA. Hues ta haya cu e interes di Gobierno ta pisa mas cu e interes di e sindicatonan SIMAR y SEPPA.
Decision: Hues ta prohibi e sindicatonan SIMAR y SEPPA pa tene cualkier tipo di accion contra e medida di Gobierno di 12.6 %.
Hues ta prohibi SIMAR y SEPPA pa yama un otro accion cu e fin pa Gobierno para e medida di 12.6%.
