Diego de Cuba contento cu lo duna informacion
ORANJESTAD (AAN): Awe Diabierna, Sindicato STA ta organizando un Seminario na Meeting Room di La Cabana All Suite Beach Resort, unda a invita tur nan delegado pa asina discuti, analiza, y compronde kico ta bay spera e clase trahador den futuro cercano, principalmente durante 2023.
Presidente di Sindicato STA, Diego de Cuba, a mustra cu tur hende por sinti cu lo bay tin bastante cambio, y tambe introduccion di e impuesto BTW y e lo no ta bay ta algo facil.
Premirando kico ta sperando pueblo y trahadornan, Sindicato STA a dicidi cu mester informa primordialmente e delegadonan di e Sindicato encuanto loke ta bay spera nan, y pesey nan a invita varios orador kendenan lo bay duna nan relato riba diferente topico durante e Seminario aki.
Nan lo bay tin ing. Edwin Jacobs kende lo papia di SVb y AZV, tambe e economista Ben Marapin cu ta bay duna su punto di bista economico financiero di e pais y con ta para, y lo bay tin Leo da Silva di Oficina Central di Estadistica kende lo papia riba e ‘Bestaansminimum’ y loke ta e tarea di CBS.
Tambe lo tin Flora Petronilia kende lo elabora riba algo importante pa pais Aruba, esta e Arbowet.
Diego de Cuba a bisa cu nan lo tin Abogado Bryan Coffie tambe cu ta bay duna un lectura encuanto e cambionan den leynan laboral. Lo bay tin un panel tambe, y aki delegadonan lo bay haci nan preguntanan riba cada topico cu lo wordo presenta.
De Cuba ta spera cu e Seminario awe lo bay ta uno fructifero pa e delegadonan.
