Team local di produccion di cine lo trata diferente situacion di bida real den nan siguiente shortfilm "Camp"

ORANJESTAD (AAN): Crioyo Productions ta un team di produccion local cu ta consisti di ocho persona talentoso cu e mision pa produci peliculanan di calidad halto lo “showcase” diferente talentonan local den nos comunidad.

   Crioyo Production a ser estableci na aña 2022. Den corto tempo nan a produci dos pelicula cortico, entre otro “Ruman” y “Night Shift”, cual ambos a wordo bon ricibi door di e publico. “Ruman” tabata parti di e proyecto internacional "Four Points Film Project" y lo wordo presenta como un “short film” e aña aki durante Playa Film Festival.

   Durante nan participacion na “Bonaire's 48-Hour Film Project”, nan segundo pelicula cortico “Night Shift” a wordo nomina den diferente categoria, incluyendo miho storia y miho zonido.  "Nos passion pa traha pelicula ta loke ta haci nos diferente di otro nan,” Jason Yarzagaray, co-fundado di Crioyo Productions a bisa. "Nos ta esforza pa produci productonan cu lo provoca emocionnan mientras cu ta ilustra diferente aspecto di nos isla y cultura.”

   Actualmente e team ta trahando ariba "Camp," cu ta priminti di bira un di nan peliculanan mas grandi. E team a pone enfasis pa busca actornan y artistanan local pa asina nan haya e oportunidad pa mustra nan talentonan na mundo henter, pero manteniendo calidad halto como standarisacion.

   E storia di CAMP ta inspira ariba eventonan real. E storia a ser skirbi door di Ephrayim Odor, un skirbido talentoso local, tambe conoci pa forma parti di e tema di Djis Pa Hari. E pelicula aki ta conta e storia entre dos amigo cu lanta y ta biba den un bario rondona cu influencianan negativo manera gang, droga y violencia.  E pelicula ta sigui dos amigo mientras nan ta nabega door di bida, tumando desicionnan, bou di pression di nan amigonan y circunstancia di bida. E consecuencia di nan accionnan lo bira mas real ora cu nan ta purba huy di e decisionnan ya tuma.

   "E proyecto aki tin como meta pa inspira hobennan (adulto) pa tuma desicionnan positive a pesar di e cosnan cu por sosode rond di nan,” Professor a bisa. "Nos ta spera di por inspira otro personanan den nos comunidad."