ORANJESTAD (AAN): Informacion nobo cu DIARIO ta dispone di dje, ta indica cu un persona nobo a wordo nombra pa guia mercadeo di Hilton Aruba.
Jessica Valbuena recientemente a worde promovi pa Marketing Manager despues di asisti e departamento di ingreso como coordinador durante ultimo cuater aña y sosteniendo e Marketing Manager basa na Merca, den tur asunto di mercadeo local.
E lo oficialmente cuminsa su rol nobo den December, despues cu e regresa for di su periodo di maternidad. Jessica a gradua na Universidad di Aruba, na unda el a obtene un BA den Hospitalidad y Turismo, como tambe un MBA, completando e programa adicional di dos aña eynan.
DIARIO a compronde cu Jessica tabata un studiante di universidad ora cu el a join e team inicialmente na Hilton Aruba Caribbean Resort & Casino na 2017, como un Marketing Stagiair, y despues a bay over na e oficina ehecutivo como griffier, dos posicion cu a brind’e un tremendo conocemento den e trabaonan cu ta worde haci na e resort, prome cu el a termina su estudionan.
Na momento cu el a gradua, el a worde oficialmente tuma pa yuda coordina actividadnan den e departamento di ingreso, generando e miho reportahenan financiero posibel, pa gerencia por set e miho prijs na e tempo adecua pa e resort su producto premier di vacacion, siguiendo y analisando precisamente biahenan mundial y trendnan di acomodacion.
E tabata trahando full-time na e resort, trahando riba su MBA thesis y na mes momento embarasa cu su prome yiu homber, na su caminda pa bira un streya den hospitalidad.
Jessica ta hopi contento pa cuminsa e siguiente fase den su carera sosteniendo e brand di e resort, yudando e crece y desaroya un base di cliente mas grandi, y capturando mas market share. DIARIO ta felicita Jessica pa un promocion bon mereci.
