Jerry Franka di Stichting Rancho
ORANJESTAD (AAN): Señor Jerry Franka ta un persona bon conoci den e mundo di Stichting Rancho, y den e area di Rancho mes. Diahuebs el a duna un relato tocante e contacto y intercambio cultural y comercial di La Guajira cu Aruba.
Den entrevista cu Matutino DIARIO, el a bisa cu Aruba, specialmente Rancho, durante historia tabata tin hopi contacto y intercambio cultural y comercial, cu La Guajira, particularmente cu Riohacha.
“Y esaki a trece cu ne, den tempo di e desaroyo di e Refineria, cu a bin hopi hende procedente di Guajira pa traha cu Lago, y di mesun forma tambe tin historia di añanan di comercio cu tabata existi entre Aruba y La Guajira.
“Bo ta haya na Guajira hopi influencia y famnan conoci akinan na Aruba ta aparece. Bo ta haya famianan Arends, Tromp, Henriquez, Pinedo di Curacao, docter Pinedo su primonan ta di eybao. Bo ta wak cu tin un intercambio hopi familiar mes. Y esaki a inspira pa hopi añanan e cultura, y vooral e area di Rancho ta bin hopi dilanti.
“Bo ta mir’e, y e intercambio aki a fortalece mas y mas, durante e ultimo diez pa diescinco aña. Ami tin hopi experiencia cu La Guajira; mi conoce Puerto Estrella, Manaure, Uribia, y varios di e lugarnan aki fuera di Riohacha, Dibulla, durante e epoca cu mi tabata bishita e area aki, tambe pa amistad”, señor Franka a relata.
Señor Jerry Franka a agrega cu tambe el a topa cu hopi intercambio, influencianan Antiyano-Arubano aya, mescos cu ta top’e aki na Aruba den area di Rancho.
Señor Franka a bisa cu tur esaki a trece cu ne cu nan a presenta, aki na Aruba, un Revista cu a bao tutela di Maria Isabel Camarga. Un persona masha conoci pa e intercambio cu Rancho y cu Aruba, y esaki tin hopi aspecto cultural cu el a trece dilanti den un forma mas comprensible pa nos comunidad”, señor Franka a relata.
