Su yiu si a wordo rescata
ORANJESTAD (AAN): Den fin di siman, oficialmente Cuerpo Policial a duna e rapport di e unidad cu a bay investiga e caso di e Waverunner perdi for di Eagle Beach cu 2 turista abordo, di cual uno a ser rescata. E otro mes, cu ta tata di famia ta desapareci.
Segun e rapport oficial di Polis, tur cos a cuminza Diabierna merdia banda di 12’or ora cu 3 turista a presenta na Warda di Polis pa anuncia urgentemente cu nan tin dos miembro di famia perdi.
Ta trata aki di Tata y su yiu homber cu ta perdi. E famia di turista ta hospedando na na un Highrise Hotel. Y riba Diabierna nan a dicidi na bay huur y core cu Waverunner riba lama.
Nan a bay na un compania di Watersport na Eagle Beach y a huur dos Yamaha Waverunner. E mama y su yiu muher a bay hunto riba un Waverunner. Su casa cu yiu homber a bay riba un otro Waverunner. Tur dos Waverunner nan a huur pa un periodo di 30 minuut cada uno.
Despues di a nabega pa 30 minuut, e Waverunner cu e mama y yiu muher a regresa bek tera, pero e otro Waverunner riba cual e casa y yiu homber ta ariba, no a regresa.
Mas despues di un rato, e dama a ricibi un SMS riba su smartphone y loke el a lesa a lage tur spanta. Ta esnan cu ainda ta riba lama a mande un mensahe, pa bise cu nan ta riba lama sin por bin bek tera.
E mama a core contesta e mensahe, y a hasta trata di yama. Pero e yamada cada rato ta bay na voicemail. Polisnan a tuma detaye di e famia, y hunto cu nan a bay pa nan Hotel, y despues a bay rumbo pa e Watersport na Eagle.
Na Eagle Beach nan a papia cu e personal di Watersport. El a declara cu e turistanan a yega eynan pa bay core riba Waverunner. A splica nan e reglanan esta di e area cu nan mag di nabega cu e Waverunner, na e banda panort, y tambe e sector banda pazuid y ta obliga di keda den e zona ey. A splica nan cu e viahe ta dura 30 minuut. Pero despues di mey ora, solamente un Waverunner a regresa. Aki a splica e mama cu si acaso e otro dura mas di 30 minuut extra, e ora nan lo subi lama pa bay busca nan.
Despues cu e mama a ricibi e mensahe di SMS di esnan riba lama, e Watersport a saca dos homber pa subi lama y bay busca, uno den parti panort den e zona, y e otro banda pazuid. Tambe el a saca un homber den un boto pa bay mas leu y busca riba lama grandi.
Nan a busca lama den tur skina pero no a topa cu nada. E Waverunner perdi ta color shinishi. E tata tabatin un jacket salbabida color cora, y su yiu homber tin jacket salbabida color blauw, y tambe cu ta e tata ta esun na stuur.
Polisnan mientras tanto a cuminza prepara pa sali cu nan Helicopter, y detaye a cuminza wordo suministra na Wardacosta. Mientras cu ta tumando declaracionnan aki na e compania di Watersport, e mensahe a drenta via Marine-Radio di e compania, cu nan a caba di topa cu e yiu homber ta drief den lama cu e jacket blauw di salbabida. Mesora a notifica Helicopter y Wardacosta di esaki.
E yiu homber a wordo haya, pero su tata mes no por a ser localiza ningun caminda. E yiu homber a declara despues, cu nan tabata nabegando riba e Waverunner y diripiente esaki a bolter cu nan y a keda boca bao riba lama. El a purba di landa bay bek tera, y su tata a keda atras cu e Waverunner.
Durante cu e ta landa, e hoben a wordo haya door di e Boto di Watersport cu a hise abordo y trece canto. Helicopter di Polis a keda bula den e area, y Polisnan Maritimo y Wardacosta di Caribe Hulandes a keda tambe buscando. E Waverunner no ta algo cu ta sink asina facil, pues hasta si e ta boca abao, e lo keda drief. E tata tambe tin jacket salbabida bisti, pues e ta supose di keda na superficie.
Na tera a busca Ambulans y Bureau Slachtofferhulp pa atende cu e hoben, pero na beach mes el a wordo controla y ta den condicion perfecto.
Helicopter y Wardacosta a keda busca te ora cu solo a baha, y no a haya e tata ningun caminda. E siguiente mainta, a bolbe usa Helicopter di Polis, como tambe e avion Dash-8 di Wardacosta cu tin equipo sofistica abordo pa detecta obhetonan cu ta drief riba lama. Pero Diasabra tampoco no a haya ni e Waverunner, y tampoco e tata.
Vacacion di e famia ta finaliza awe Dialuna 4 di September cu plan original pa regresa bek pa Merca.
