Sector economico mundial ta cuestiona cifranan real di inflacion
*Expertonan mundial ta vigila impacto riba Dianan di Fiesta 2023
*Costo di bida ta bira discusion cu aumento prijs mundial di gasolin
ORANJESTAD(AAN): Kico prijs di petroleo lo haci cu prijs di gasolin, electricidad, awa y asina tur prijs na Aruba?
Kico e lo nifica pa prijsnan di tur producto cu mester wordo importa den e tempo venidero?
Kico e futuro inmediato lo trece pa economia mundial, ta un pregunta serio mientras condicionnan pa causa aumento di costo di bida ta sigui crece tur dia.
E pensamento cu inflacion no ta problema mas, ta wordo ataca actualmente na forma directo dor di expertonan di renombre mundial, cu ta indica cu informacionnan cu ta wordo pasa na publico, no ta crea e realidad cu e consumidor ta ricibi den hopi caso.
Durante siman cu a pasa y sigur fin di siman, DIARIO mester a atende cantidad di informacion cu a drenta y ta mustra riba e realidad, cu Pueblo mester ta conciente di factornan cu ta influencia e costo di su bida.
Kico prijsnan cu ta dicidi pa costo di bida lo ta sigur na fin di 2023? Pregunta cu a causa discusion internacional.
Na Hulanda el a conduci na un confrontacion directo entre e economista di uno di e banconan mas renombra Hulandes, cu a mustra cu e cifranan di inflacion cu Gobierno di Hulanda a trece dilanti, no ta cuadra cu e realidad di inflacion, motibo directo pa costo di bida.
Segun informacionnan di Gobierno Hulandes, e porcentahe cu cual prijsnan na Hulanda ta subi, a baha cu tres porciento.
E experto economico di Rabobank na Hulanda, cu ta duna pronosticonan riba costo di bida, a descubri cu inflacion cu ta describi e realidad di aumento di costo di bida, ta 9.7 porciento compara cu Augustus di 2022.
E banco tin otro sistema pa calcula inflacion manera a bini dilanti den e disputa cu no ta limita den seno di expertonan Hulandes so.
Kico prijs di gasoline lo haci cu costo di bida ainda na 2023? E realidad di prijs di petroleo a bini dilanti den e cifranan real di prijs mundial di petroleo na e momentonan aki, cu ta motibo sigur pa spierta comunidadnan, cu 2023 por cera cu aumento di prijs di combustibel loke lo afecta tur prijs na mundo.
Mas y mas expertonan ta indica cu mester informa e publico cu directamente ta bira victima di prijs di petroleo, pa loke por spera sigur den e dianan di fiesta 2023.
Prijs di combustibel manera semper DIARIO a mustra su lectornan, no ta depende di e prijs di petroleo awe pero di resultadonan di lunanan anterior.
Ora papia di e peso riba costo di bida, mester mira futuro den cual mundo ta acerca dianan di fiesta cu ta nifica mas consumo di energia, mas gasto cu ta aumenta costo di bida.
Expertonan mundial a papia ayera di e prijs di petroleo, cu ayera a cuminsa acerca e prijs di 90 Dollar pa baril of den e caso di Murban Crude a surpasa 90 Dollar pa baril.
Pronosticonan di expertonan internacional ayera tabata cu e demanda mundial pa petroleo na 2023 lo aumenta pa baha na 2024.
Pa Aruba pues e pregunta grandi ta keda, kico prijs di petroleo lo haci cu prijs di gasolin, prijs di awa y electricidad, manera DIARIO a trece dilanti.
Prijsnan cu lo dicidi pa prijs di tur otro producto riba tereno mundial. Como pais di importacion pa Aruba esaki sigur ta nifica, cu mester tene cuenta cu durante e ultimo parti di 2023, e prijs internacional di tur producto lo subi a base di prijs di transportacion cu ta sigui aumenta mundialmente.
Den e presentacionnan di mas y mas experto ta bini dilanti e peso cu esaki ta nifica sigur pa e parti di poblacion cu poco entrada y e forma cu e lo aumenta grado pobresa na tur pais.
DIARIO ta pendiente tur desaroyo mientras e ta sigui tur aspecto cu por influencia aumento di costo di bida na momento cu mundo y sigur Aruba ta prepara pa e temporada di Dianan di Fiesta, sigui pa temporada di Carnaval, cu ta aumenta actividad economico na Aruba.
