Tayer di Fundacion Movimento ta Bida tabata dedica specialmente na e personal di SVGA

Carla Briezen, Zorg Manager di SVGA:

*Y asina stimula nan cliente y alumnonan! 

ORANJESTAD (AAN) – Dialuna cu a pasa Stichting Verstandelijk Gehandicapten Aruba (SVGA), a participa di un tremendo y exitoso tayer di trabao, parti den tres tema, y cu a wordo otorga pa Fundacion Movimento ta Bida, y cu ta basa den nan Congreso CAAC (Caribbean Active Aging Congress), cu a tuma lugar na November 2022.

Den un entrevista cu Carla Briezen, Zorg Manager di SVGA el a comparti cu DIARIO su experiencia cu e tayer aki, cu, por cierto, a tuma henter dia y e 90 trahadornan cu ta forma su personal, a turna pa nan tur haya e informacion.

Carla Briezen  a menciona cu algun miembro di su personal tabata presente durante e Congreso di CAAC, cu tabata asina interesante y importante, cu SVGA a dicidi pa tur su personal haye.

E tabata un dia specialmente pa e personal di SVGA cu ta dedica na nan salud y cu a cubri tres area, por ehemplo e parti di con bo ta bira mas grandi di un forma saludable door di keda activo. Tambe tin e parti di nutricion y di salud mental cu a conforma e programa. E tayer aki tabata dirigi na e trahador na prome lugar, pa nan tur bira un tiki mas conciente con nan por cuida nan mes miho. Pero tambe tin e meta con e personal ta bay stimula locual nan a siña cerca e cliente y alumnonan di SVGA.

El a reitera cu esaki a abarca nutricion (alimentacion), movecion y tambe pa keda activo mental y socialmente.

El a gradici personanan di IBiSA, DVG, POH, DAS, pa nan cooperacion. Carla Briezen a subraya cu awo bo ta tende tur caminda den salud mester cubri tur e basenan. Pues, no enfoca riba un aspecto so, pero cuida bo mes integralmente.