Tayer di arte y moda lo ser duna door di Glenda Heyliger na October

Titula ‘Nubia, Nubia, Nubia’

ORANJESTAD (AAN): Ateliers ’89 Punto Di Beyas Arte Aruba ta presenta su tayer nobo di arte extraordinario di Moda, pa e luna di October. Cu lo worde guia pa e artista maestra Glenda Heyliger procedente di San Nicolas Aruba. Cuminsando Dialuna 3 pa Diahuebs di 27 di October. 

   Esaki lo ta e tayer di arte y moda titula ‘Nubia, Nubia, Nubia’ cu Glenda Heyliger.

   DIARIO a compronde, cu den e tayer aki hunto cu Glenda Heyliger ta bay busca “Mensaheronan di arte y  di moda”.

   “E mensaheronan ta indicadornan di un suceso cu lo pasa den futuro y nan lo anticipa esaki.  E pecho cora (roodborstje) ta un mensahero di lente – su presencia ta nifica cu lente ta acerca.

   “NUBIA” como tema ta nos inspiracion. Nubia ta bisti nos mundo y asina tambe ta nos paña, si ta haci calor of friu. Nubia ta nos aparencia elegante, for di un liña fini te un nubia di tormenta cu ta menaza. Nan ta kishiki  nos imaginacion y ta cuminda pa nos imaginacion. Contemplando e cielo ta spierta creatividad. Ademas cu e ta bunita, e ta yuda meteorologonan pronostica e tempo. Tambe e ta yuda otro investigado cientifico studia bida na mundo y asina indica posibel suceso den futuro. Nubia ta un parte importante di e tempo na tera. Por ehempel nan por cambia den awasero. Tur funcion di e nubianan riba habitantenan di nos planeta, ta tanto positivo como negativo. 

   Durante e tayer nos ta haya inspiracion door di formanan di e nubia y con esaki ta relata cu nos manera di mira moda. Produccion actual di nos moda ta contamina e mundo y e awa. E awa na su turno ta cambia den gas invisibel y un parti e ta cambia den nubia cu ta contene damp di awa. E proceso aki yama evaporacion

Kico lo pasa si  nos laga nos mirada actual di moda evapora? E moda evapora lo bira moda di nubia; un moda invisibel? Nos ta wak e mensaheronan como un manera nobo y duradero pa anda cu moda y nos por pa medio di nos arte ya caba duna forma.

   Cu Glenda nos ta bay investiga y nos ta saca nos creatividad pa medio di proceso visual. Asina nos ta traha un propio arte meteorologico y un carchi di moda di tempo.

    Glenda Heyliger (naci na Aruba na 1957) a studia teatro y Art-direction na Academia Gerrit Rietveld na Amsterdam y for e tempo ey e ta activo como docente y artista di arte visual. Ora el a regresa Aruba e tabata e motor tras di SINFA Art Gallery na San Nicolaas. Como docente e tabata relaciona cu Academy for Fine Arts Aruba y Cas di Cultura. Por a mira su trabaonan na diferente exposicionnan internacional na Europa, Merca y Sur America.

   Actualmente Glenda ta biba y traha na San Nicolas.

    Pa inscribi por yama manda un email na This email address is being protected from spambots. You need JavaScript enabled to view it.. E tayer aki di moda ta pa un luna y ta cumindsando Dialuna 3 di Oktober pa Diahuebs 27.

   Di Dialuna pa Diahuebs di 6.30 pa 9.30pm. Edad ta 12 aña pariba. Ateliers ’89 Punto Di Beyas Arte Aruba ta situa na Dominicanessenstraat 34 na Oranjestad. Na banda drechi di caminda crusada Maria College. Inscribi mas pronto posible ya cu cuponan ta limita.