ORANJESTAD (AAN): Jamie Bareno a gradua como un Chopra Total Well-Being Coach na Juni 2022 y a conoce Dr. Deepak Chopra den un retiro spiritual na Hawaii na mei 2022.
E ta e prome persona pa wordo certifica den Caribe como un Chopra Total Well-Being Coach y tambe ta den un di e prome 100 mundialmente cu ta certifica den e area aki di coaching. Pa celebra e logro aki, Jamie ta organisando un serie di workshops gratis pa comunidad.
Jamie ta invita tur interesado pa atende un healing workshop virtual cu tema: “Conversations with your Inner Child” riba Diahuebs 22 di september pa 8:00 pm.
E workshop aki lo yudabo pa cuminsa un relacion cu e version mas jong di bo, pa asina cuminsa yuda cu traumanan cu ta manifesta den bo bida te cu dia di awe. E proceso di identifica y trata e eventonan cu a causa trauma ora bo tabata jong, por dunabo liberacion emocional y trece e paz mental cu nos tur ta desea.
E workshop aki ta pa hende di tur edad y profesion. Combinando ciencia cu spiritualidad ta un area di experticio cu Jamie ta specialisa aden. E idioma di e workshop lo ta na ingles.
Jamie Bareno ta un yiu di tera cu mayor imigrante cu a gradua cu su Bachelor’s y Master’s Degree na Universidad di Aruba. E la sigui su carera den mundo bancario pa 10 aña largo, pa despues sigui su proposito riba mundo di educa y yuda personanan con pa yega na felicidad y sufri menos, implementando spiritualidad den nan bida.
