Carlos Anthony Bermudez (AVP)
ORANJESTAD (AAN): Parlamentario Carlos Anthony Bermudez a tuma nota cu taxistanan ta para dilanti di e ex-edificio di DOW pa baha turistanan di barco crusero. Segun e parlamentario, e situacion aki ta crea dos problema principal:
- E trafico ta wordo stroba den e area;
- E turistanan ta wordo poni den peliger ora nan mester crusa caminda pa por yega na e porta di waf (Gate 5) cu como consecuencia cu nan no ta haya e servicio optimal.
Parlamentario Bermudez ta reconoce cu e obhetivo di nos taxistanan ta pa duna un servicio excelente na e turistanan y ta expresa su sorpresa cu nan tin cu para dilanti di e ex edificio di DOW mientras cu otro proveedor di transporte si tin acceso pa por baha turistanan dilanti porta di waf (Gate 5).
Despues di busca mas informacion, a bin compronde cu taxistanan no tin acceso mas pa drenta e area, caminda cu e otro proveedornan si tin acceso. Bermudez ta considera esaki un forma di discriminacion den transporte y ta condena esaki rotundamente, pidiendo atencion inmediato pa garantisa seguridad di e turistanan y pa trata tur proveedor di transporte igual.
Bermudez a dialoga cu algun taxista y a wordo informa cu e motibo principal pa prohibi entrada na e taxinan ta basa riba keho cu "algun taxista ta pasa duro" den e ruta en cuestion. E parlamentario ta di opinion cu esaki no ta un argumento cu peso pa perhudica e resto di taxistanan ni pa baha e nivel di servicio cu Aruba kier mustra na su bishitantenan.
Segun parlamentario Bermudez, taxistanan cu no ta cumpli cu regla mester wordo atende individualmente y no mester perhudica esnan cu ta traha segun regla\manera corecto.
E echo cu turistanan mester baha banda di caminda, mientras cu ta posibel pa baha nan directamente dilanti di porta di entrada di Waf (Gate 5), Bermudez ta considera un degradacion di e servicio sublime cu taxistanan kier ofrece.
Den e area di waf tin un borchi di “Verboden voor Ingang”, bou di cual tin dos oro borchi:
- “Bestemd voor Tour Bussen en Havenpersoneel”
- “tussen 07.00 - 23.00 uur”
E parlamentario ta pidi claridad riba e regulacionnan aki y ta insisti cu un solucion inmediato mester wordo implementa pa:
- Garantisa seguridad di turistanan;
- Trata taxistanan cu igual respet manera otro proveedor di transporte;
- Mantene e nivel di servicio turistico cu Aruba ta desea di mustra na su bishitanan.
A Base di esaki Parlamentario Bermudez a haci minister Dowers e siguiente preguntanan:
- Minister ta na haltura cu ta nenga taxinan baha turistanan dilanti di porta di Waf (Gate 5)?
- Minister por splica riba ki base legal of regulacion ta prohibi entrada di taxinan den e area di Waf (Gate 5)?
- Kico ta e criterio exacto cu e autoridadnan ta usa pa permiti solamente tour bussen y havenpersoneel drenta, mientras cu taxinan ta wordo exclui?
- Minister ta considera cu e situacion actual ta compromete seguridad di turistanan cu mester crusa caminda cu trafico activo pa yega na tereno di Waf (Gate 5)?
- Minister ta di opinion cu trato desigual entre proveedor di transporte por ta considera como discriminacion, y kiko lo ta e paso pa preveni esaki den futuro?
- Minister ta comparti e pensamento cu si acaso un taxista no ta comporta su mes ariba e ruta en cuestion cu ta cu e taxista concerni mester atende cu ne y no mester perhudica e otronan cu si ta comporta nan mes?
- Suscrito ta di opinion cu e solucion ta den cambio di e borchi actual cu e texto “Bestemd voor Tour Bussen en Havenpersoneel” pa un borchi cu e text “Bestemd voor Tour Bussen, Taxi en Havenpersoneel”
- Minister ta dispuesto pa hiba dialogo cu organisacionnan di taxistanan y e autoridadnan relevante pa yega na un solucion husto y igual?
Parlamentario Bermudez a haci un suplica na Minister Athur Dowers pa contesta e preguntanan por escrito.
Na opinion di parlamentario Bermudez e solucion ta cuestion di cambia e texto di e borchi “Bestemd voor Tour Bussen en Havenpersoneel” pa un texto “Bestemd voor Tour Bussen, Taxi en Havenpersoneel”
Den e spirito di harmonia y colaboracion, nos lo sigui subi e nivel di servicio pa nos turismo di crusero.
