ORANJESTAD (AAN): Diasabra atardi, e ciudadano Ramon Contreras kende ta tata di e DJ hoben kende Diadomingo dos siman pasa a perde su bida despues di cay for di piso halto di Parkinglot di Paseo Herencia, a duna su punto di bida riba e caso aki.
Contreras a indica cu e poco forza cu nan tin ainda, nan ta hopi agradecido na Cuerpo di Recherche cu ta trahando duro pa soluciona e caso aki cu a kita bida di Luis Angel.
E tin confianza den Husticia di Aruba y e leynan existente, y tambe den Cuerpo Policial di Aruba y e oficialnan hudicial di Recherche. Nan a wordo ricibi recien door di Recherche y e trato tabata duna famia confianza cu nan tambe kier soluciona y haya sa e berdad.
El a splica cu e famia ta den lucha, kedando pendiente pa cualkier desaroyo di e susedido aki
“Nos ta sigui cu fe den Dios prome cu nada, y tambe den Husticia na Aruba,” e tata a bisa. Contreras a bisa cu si e curpa di Luis Angel tin di keda sea 1 luna, of 2 luna, of 3 luna den mortuario pendiente e investigacion y pa logra haya un contesta, e por keda eynan, tanten cu Recherche y oficialnan Hulandes di Ministerio Publico sigui traha riba e investigacion.
Ramon Contreras a indica cu e tin 26 aña bibando na Aruba, y e ta gradici un biaha mas tur esnan di Recherche, y el a bisa cu e ta kere hopi den e leynan valido na Aruba.
Esnan cu tin informacion, por yama e Tipline di Polis na 111-41, y corda cu bo por keda anonimo.
