Porfin Colombia a logra captura e criminal mas busca ‘Otoniel’

Riba di 500 oficial riba pia pa evita cu e ta bay huy ---- BOGOTA: E criminal mas busca na Colombia den ultimo añanan, a wordo captura riba Diasabra banda di 3’or di atardi. 

Su nomber oficial ta Dairo Antonio Úsuga y e ta e hefe maximo di e Clan del Golfo.  Pero pa tur hende e ta conoci como ‘Otoniel’ y semper a sa di sconde y a bira asina un simbolo di maldad.  Pero awor un operacion conhunto di Forza Militar y Polis, cu mas di 500 oficial riba pia, a logra gare.

   Otoniel tabata scondi na Necocli na departamento di Antioquia, den e area conoci como Nudo de Paramillo meymey di Sero Yoki y Sero Azul.  Esey ta un zona hopi rural cu ta full rondona pa su trahadornan cu ta vigila tur rond.  Ta parce comosifuera e tin un muraya di security ta dune confianza pa keda scondi eynan.

   Pero a dura Ehercito y Polis di Colombia un total di 10 luna pa kibra e muraya di security ey.  Nan a haci esey cu e asina yama ‘Operacion Osiris’, cu ta un plan cu a nace di Januari 2021 cu e mision pa compronde cu precision tur movimento cu Otoniel tabata haciendo rond di su escondite.  Y nan a haci esey cu yudanza di inteligencia di Merca y tambe Reino Uni.  Nan a analiza milimeter pa milimeter e structura di cada nivel di Security di e gran criminal aki.

   Ultimo lunanan, nan a cuminza descubri tur e sistema di operacion di e Security-Link rond di Otoniel, y asina a cuminza compronde e diferente ruta di movimento cu nan tabata tuma for di e area unda nan ta scondi.  Otoniel den tur e lunanan ey no a bin ripara nada mes cu su ocho nivel di Security-Link rond di su escondite tabata cayendo poco-poco den otro.

   Dos siman pasa Diabierna 15 di October pa 8:00 pm, na un cuartel na Bogota, un grupo di militar y Polis a reuni pa planea con ta finaliza e operacion ey.  Na e momento ey autoridad a logra kibra 7 Security-Link caba di Otoniel, pues falta 1 so mas.  Y Otoniel no tabata sa mes.  Nan a ripara cu Otoniel ta bishita ningun cas den e area.  E no ta comunica via celular mes, y tabata come cuminda produci na e region ey mes unda e ta scondi.

   Pesey a reuni pa desaroya y planea con ta kibra e ultimo Security-Link di Otoniel.  Asina e decision a cay cu e operacion lo bay ta Diasabra 23 di October.  A reuni tur recurso y den oranan di madruga nan a start cu e operacion.  Esey ta loke general Luis Fernando Navarro di ehercito a splica.

   E miembronan di Forzanan Special di Ehercito y Infanteria di Marina a blokea e caminda y area di rieunan, y Forza Aereo a ofrece cobertura pa e hombernan riba tera por cana y sigui rumbo pa e lugar unda e ta scondi.

   Un total di 22 Helicopter den aire, y tropanan militar na varios lugar a permiti nan kibra e ultimo Security-Link.  Y asina pa 3:00 pm nan a captura Otoniel.

   General Jorge Luis Vargas valencia di Polis Nacional, a splica cu e Security Link tabata move entre 1 y 3 kilometer di distancia di su lugar exacto cu e ta scondi.

   Un total di 150 unidad di inteligencia a wordo manda pa e zona, y asina a start e operacion contra e narcotraficante mas busca.  Entre nan tin 50 experto di inteligencia cu tabata vigila cada movimento via imagen live di satelite.

   Inteligencia Colombiano tabata sa desde September caba cu Otoniel ta den e zona di Nudo de Paramillo, y varios hende a cuminza confirma esey.  Pero a bin compronde mesora cu el a diseña un sistema di Security rond di dje pa avise di trempan caba si acaso autoridad of ehercito ta yegando cerca.  Su Security-Link aki ta forma 8 nivel cu el a kere cu no por wordo kibra.

   Pero debi na awacero, casi Otoniel no tabata sali di cas.  Esey a pone cu su Security-Link tabata keda stabil na mesun area, y esey a yuda autoridad identifica nan y traha riba un plan.

   Otoniel ta wordo busca intensamente desde 2015 den region di Uraba pa miles di Polis y Militar den e dos fasenan di ‘Operacion Amagenon’ unda a gara decenas di homber cu ta cay bao di su mando, y a confisca varios ton di cocaina. 

  Autoridad ta mustra cu Clan del Golfo ta responsable di transporta hopi ton di cocaina pa Merca, y a bira un red criminal dedica pa cobra extorsion di empresario- y comerciantenan di region di Uraba cu ta na frontera cu Panama, y tambe na costa di region di Caribe.

   E ta un homber acusa di mata numeroso Polis y lider Social como parti di su strategia di crea teror den zonanan unda su grupo ta opera.

   Ora nan a captur’e, e tabata lomba sunu y aunke el a trata na huy, toch el a wordo gara.  Den apenas par di minuut despues, ya e tabata wordo transporta pa Bogota unda e ta bao cuido halto di seguridad militar awor.