Taskforce di Reino pa Derecho di Mucha ta conclui un reunion exitoso na Aruba

ORANJESTAD (AAN): Recientemente Taskforce di Reino pa Derecho di Mucha a tene un reunion exitoso na Aruba,

marcando un logro importante den e colaboracion continuo pa fortifica proteccion y promocion di derechonan di mucha den henter Reino.

    E reunion a keda presidi pa Señora Sacha Geerman di Ministerio di Asuntonan Social di Aruba, kende actualmente ta fungi como Presidente di e Taskforce. E encuentro aki tabata e prome reunion en persona desde e desaroyo y aprobacion di e Cuadro Strategico, Plannan di Accion Nacional y Cuadro di Monitoreo. E documentonan aki a worde crea cu ayudo di UNICEF Hulanda. Pa prome biaha den historia di e Taskforce nan tin un acercamento structura y midibel pa cooperacion entre e islanan.

   Como consehero strategico di Taskforce, UNICEF Hulanda tambe tabata presente durante e reunion, ora cu cada isla a comparti e resultadonan di un tarea, resaltando diferente situacion vulnerabel cu muchanan ta enfrenta dentro di nan contexto local. Saba a presenta riba vulnerabilidad di muchanan migrante den enseñansa, Bonaire riba criminalidad hubenil, Curaçao riba muchanan indocumenta, St. Eustatius riba muchanan cu autismo, St. Maarten riba hubentud y criminalidad y Aruba riba muchanan cu necesidadnan special.

   E reunion a inclui tambe discusionnan riba cuido residencial entre isla i paisnan den Reino, Aruba su plan di mayor y e programa “Alleen jij bepaalt” riba prevencion y cambio di comportacion. E miembronan di Taskforce tambe por a experencia Team-up: un programa cu ta duna sosten psicosocial na muchanan cu ta enfrenta circunstancianan vulnerabel.

    Den su palabranan di apertura, Minister di Asuntonan Social, Cuido di Adulto Mayor y Maneho di Adiccion, Señora drs. Mervin Wyatt-Ras, a yama e miembronan di Taskforce bon bini cu un discurso inspirativo cu a enfatisa e poder di colaboracion y e responsabilidad comparti di tur isla pa salvaguardia derechonan di mucha.

   Durante e consultanan, e paisnan Aruba, Curaçao y St. Maarten a duna informacion riba e progreso haci pa loke ta trata e recomendacionnan di e Comite pa Derechonan di Mucha, for di e audiencia di 2022. Miembronan tambe a intercambia update riba e monitoreo di plannan di accion nacional y a haya e oportunidad pa intercambia cu Aruba su Comision Derecho di Mucha.

   E programa a conclui cu bishitanan opcional na Scol basico Dornasol y Scol Dun’ un man. Tur dos ta sostene muchanan cu necesidadnan special den enseñansa.

   Taskforce a expresa gratitud na Gobierno di Aruba pa su caluroso hospitalidad y organizacion exitoso di e reunion. E islanan a reafirma nan compromiso conhunto pa sigura cu cada mucha den Reino por crece sigur, cu oportunidad y acceso igual na cuido, educacion, y proteccion.