Awe Carnaval 72 ta start oficialmente na Aruba

Evento bailabel di grupo nobo ‘Hepa’ di Carnaval

• Premio di 10 mil Florin pa e reina corona awenochi 

ORANJESTAD (AAN): E ta un tradicion di hopi decada caba!  Riba fecha 11/11 nifica e comienso oficial di Carnaval na Aruba, y awe Diamars 11 di November 2025 lo ta observando e ‘Elfde van de Elfde’.

   Diamars anochi mes, 11 di November 2025, lo bay tin eligimento di Reina pa sa kende lo representa e organizacion Hepa DMC Society.  E eleccion lo ta Punto G Aruba, cu ta e tereno di ex-Bochincha Container Yard net pazuid di edificio di Dimas.  Lo tin animacion musical di Tsunami, D’Nova, DJ Sky, y DJ Rwin.  E actividad bailabel lo ta for di 7:00 pm te cu 12:00 am, y asina ta ‘Cana Kibra den Carnaval 72’.  Hepa DMC Society tambe lo participa den Fakkel na Januari, y ta bende nan ticket y paña caba pa jump den Parada di Flambeu.

   Premio di 10 mil Florin: Pa e eleccion awenochi riba tereno di Punto G Aruba, e candidatanan cu a inscribi tin entre 18 y 28 aña di edad, y e candidata lo ricibi tambe e pana cu ta bay Fakkel cu ne.  E speech por tin un duracion maximo di 2 minuut.  E show di cada candidata lo bay ta dura 5 minuut, pero no mag di participa cu bailarin of bailarina riba escenario.  Pues ta e candidata mes tin di presenta riba escenario, cu baile, etc.  Huradonan lo mira con cada candidata ta duna presentacion, y ta interactua cu publico.

   Esun cu wordo corona como Reina di Hepa DMC Society, lo bay participa pa Eleccion di Reina grandi di Carnaval 72.

   Hopi trempan mes: Celebracion di Carnaval 72 e biaha aki lo start trempan debi cu e Parada Grandi mes lo bay ta Diadomingo 15 di Februari 2026 pa 11:00 am, pues hopi riba man.

    Pesey mes, Diasabra awor (15 November) ya tin eleccion di prins y pancho na Aruba.
    DIARIO ta desea tur candidata pa e certamen awenochi, tur clase di exito.  Goza di e premio gordo di 10 mil Florin.