Tasa di inflacion pa e periodo di April 2021 te cu April 2022 ta 2.6%

Oficina di Estadistica: * Bestaansminimum tambe ta keda subi

ORANJESTAD (AAN):   Oficina di Estadistica a informa cu e Indice di Prijs di Consumo (CPI) pa luna di April 2022 ta 102.16, loke ta representa un subida di 0.7% compara cu e indice di Maart 2022 (101.47) y acumulando un subida di 1.5% te cu na April di e aña aki.

E cambio di e CPI pa e ultimo diesdos (12) lunanan (April 2021 te cu April 2022) ta 4.7%, un subida di 5.1 punto di porcentahe (ppt) compara cu e periodo corespondiente di aña pasa (-0.4%).

E promedio anual di e tasa di inflacion pa e periodo di April 2021 te cu April 2022 ta 2.6%, un subida di 4.9 ppt compara cu e -2.3% registra den e periodo di April 2020 te cu April 2021.

Durante e luna aki, cuatro (4) di e diesdos (12) sectornan a registra subida di prijs. E subidanan cu tabata tin e mayor efecto riba e CPI a wordo registra pa e sectornan di “Transporte” (7.5%) y “Cuminda y bebida no-alcoholico” (1.5%), causando un efecto di 1.04 y 0.17 ppt, respectivamente.

E subidanan den e sectornan restante a contribui cu un efecto di 0.03 ppt riba e CPI di April 2022. E subidanan aki a wordo contraresta parcialmente door di principalmente caida den e indicenan di e sectornan di “Paña y sapato” (-9.0%) y “Mobilario” (-1.7%) cu a contribui cu un efecto di -0.25 y -0.16 ppt riba e CPI di April 2022.

E caida den e sector restante a contribui cu un efecto di -0.03 ppt riba e CPI di April 2022. E subida den e sector di “Transporte” a wordo causa door di principalmente un subida den e categoria “Gasto relaciona cu uso di vehiculo di transporte personal” (7.7%), causando un efecto di 0.68 ppt, respectivamente.

E subida den e sector di “Cuminda y bebida no-alcoholico” a wordo causa principalmente door di un subida di 1.7% den e categoria “Cuminda”, causando un efecto di 0.16 ppt.

E caida den e sector di “Paña y sapato” a wordo causa principalmente door di un caida den e categoria “Paña ” (-9.0%), causando un efecto di -0.19 ppt.

E caida den e sector di “Mobilario” a wordo causa principalmente door di un caida di 8.0% den e categoria “Aparato pa uso domestico”, causando un efecto di -0.21 ppt. 

Canasta di consumo 

E canasta di consumo di e CPI ta consisti di 408 bienes y servicionan. Compara cu Maart 2022, 44.6% di e bienes y servicionan aki a conoce un aumento di prijs causando un efecto di 1.84 ppt, mientras cu 40.4% ta mustra un caida di prijs, cu a contribui cu un efecto di -1.17 ppt y pa e restante 15.0% no tabata tin cambio den prijs.

Prijsnan di bienes a subi cu 0.8% y a causa un efecto di 0.49 ppt. Prijsnan di servicionan a conoce un subida di 0.5% y a causa un efecto di 0.19 ppt riba CPI di April 2022. 

Core inflation

E CPIC (core inflation) - CPI excluyendo e efecto di energia y cuminda - a registra na April 2022 un subida di 1.2%. E indice di energia - cu ta consisti di e productonan: electricidad, awa, gasolin y diesel a registra un subida di 8.8%. E indice di cuminda a registra un subida di 3.0%. 

Bestaansminimum

E bestaansminimum pa un hogar consistiendo di dos (2) adulto y dos (2) mucha (edad 0-14 aña) na April 2022 ta Afl. 5,003, un subida di Afl. 253 compara cu April 2021 (Afl. 4.750).

E bestaansminimum pa un hogar di un (1) adulto ta Afl. 2,382, un subida di Afl. 120 compara cu April 2021 (Afl. 2.262).