Anuesca Baly, SKOA: *Tema ta keda den man di gobierno
ORANJESTAD (AAN): Directora di Stichting Katholiek Onderwijs Aruba (SKOA) tabata den un entrevista dialuna mainta na e programa Entrevista di Dia na Hits 100FM unda el a duna algun informacion relaciona cu e situacion rond di e aumento di schoolgeld.
El a confirma cu 585 florin ta e tarifa nobo cu nan kier bin cu ne pa scolnan basico y 635 florin pa MAVO.
Baly a bisa cu esaki ta e suma tumando na cuenta e 4 miyon florin cu ta habri di primanan cu no a wordo paga durante e di dos añanan. Esey ta e calculacion cu a wordo haci, a remarca.
El a agrega cu si nan no ta haya esaki for di e subsidio cu a wordo baha, e ora tin cu hay'e for di un otro manera. SKOA kier percura pa su scolnan ta higienico tanto pa e alumnonan como pa e maestronan.
Nan no por bisa cu nan kier kita un trahador di limpiesa pasobra mester di un hende pa haci limpi den e scolnan, Baly a enfatisa.
E directora di SKOA a confirma cu e asunto di e werksternan no a wordo resolvi for di tempo di Minister Lampe y awor esaki por bisa, ta e motibo pakico awor gobierno lo mester bay den dialogo bek cu SKOA relaciona cu e tema aki.
For di dos aña caba e situacion aki ta andando. Aworaki ta na Maart 2022 y e solucion a pesar cu e tey, no a wordo honra. Ya caba tin un advies di e comision caminda mediador a bin c'un solucion, pero e solucion no a wordo ehecuta.
"Aworaki nos a bolbe. Nos a duna e beneficio di duda y nos a sinta den e comision di Minister di Enseñansa nobo caminda cu a bin atrobe cu ideanan pa futuro, pero no ta bin ideanan pa atende cu locual ta atrasa", a remarca.
Baly a duna di conoce cu SKOA ta habri y ta duna tur beneficio di duda y kier traha cu Minister di Enseñansa cu ken ta trahando bon caba y e otro proyectonan ta bayendo bon, a splica.
Djis riba e punto aki no tin un solucion, a splica.
Anuesca Baly a indica cu e suma aki lo bira un suma final ora cu e atraso wordo kita for di riba mesa. Aworaki e tema aki ta den man di gobierno pa sea hisa e subsidio y kita e parti aki. Sino por delibera, pero e problema ta keda ya cu SKOA no ta un instancia cu ta genera placa. E placa cu ta wordo genera via di schoolgeld no ta subsidiabel pasobra gobierno no ta cumpli cu ne y pesey SKOA ta haya un subsidio, a bisa.
Door di esaki, SKOA ta cobra un schoolgeld y no ta SKOA so, pero tambe otro fundacionnan den veld di enseñansa pa asina por cubri gastonan cu no ta wordo subsidia, Anuesca Baly a declara.
