ORANJESTAD (AAN): Habitantenan di Simeon Antonio y Cas Paloma ya no kier guera mas!
Loke nan kier awor ta pa sinta y mira loke Gobierno y demas instancianan lo haci pa asina fix pa semper e problema cu nan tur tin cu e Dump di Parkietenbos.
E vocero di e grupo, Marjorie Vermeer-Luidens cu un bandera blanco den man, a indica cu ultimo dianan nan tabatin reunion cu e habitantenan pa asina dicidi kico mas pa haci. Pasobra ya nan a sinti cu nan a haci demasiado pa hala atencion riba e problema. A manda tur clase di carta, rapport, incluyendo uno di PAHO cu a wordo manda pa Tweede Kamer, igual pa Premier Hulandes Rutte, y Secretaria di Estado pa Relacionnan di Reino.
Den ultimo reunion a puntra, kico mas tin pa haci? Algun a bin cu sugerencia pa busca par di Trucks y blokea e entrada di Dump pa asina yuda pueblo bira mas conciente riba nan problema. Pero nan ta conciente cu no por blokea esaki.
“Tur hende sa di nos problema,” Marjorie Vermeer a indica. “Aki no tin Arubiano cu no sa, y nan ta hasta yamami Señora Dump.”
Toch e grupo ta mirando un luz na final di e tunnel. Nan a caba di mira loke Ministro Ursell Arends a haci, kende a bin cu un solucion pa e instalacion di Planta RZWI na Bubali, caminda e proyecto ta costa 60 miyon, pero e ta indica cu Aruba tin 16 miyon so pa paga pa drecha tur esey.
“Pero el a cuminza habri caminda, y tur e Hotelnan mi ta kere lo bay chip-in pa drecha e problema di RWZI Bubali pa evita cu awa ta bay directamente den lama,” Vermeer a indica. Esey ta pasobra Hotelnan ta handle cu turista y asina ta proteha turismo. Sinembargo e Arubiano tambe tin derecho!
“Awor nos no ta bay bringa mas, y nos kier djis simplemente mira di Gobierno kico nan lo bay haci, y ki dia,” Marjorie Vermeer a indica. Nan kier sa ki dia lo bin cu ehecucion di e Plannan.
Aunke awor a nota cu ta buscando ideanan di comunidad riba kico por haci mihor pa por deshaci di desperdicio, toch segun e grupo, e ideanan aki pa basta tempo caba ta poni riba mesa. Den pasado durante un reunion cu nan a tene cu Ecotech, nan a yega di haya splicacion detaya riba e plannan aki, cu ta full cla.
E grupo sa di e proceso pakico ta dera e resto di sushi den pakinan bao di tera na Sero Tijsji. Tambe nan sa cu 70 pa 80% di sushedad ta wordo manda y recicla via di Ecotech. Lamentablemente toch 20% di resto di sushi ta finaliza riba Dump di Parkietenbos, y esaki ta inclui material cu no ta limpi, manera tire di auto, material di construccion, verf, quimico, etc. Djis pasobra no ta existi ley cu ta stop esaki di socede.
Y esaki ta loke Marjorie Vermeer y e grupo ta spera cu Ministro lo bin cu leynan cu ta prohibi pa bay deposita tire, quimico, etc., na Dump di Parkietenbos. Pasobra na Ecotech ya tin equipo pa deshaci tire na un forma safe, pero ta necesario pa cobra un ‘fee’ pa cada tire cu wordo deposita na Ecotech pasobra pa destrui un tire ta tuma hopi mas trabao, y ta hiba mas proceso.
Pakico hiba tire pa dump, siendo cu Ecotech ya caba tin na Aruba full un proceso pa disolve tire bieu na un forma corecto sin peligro? Pero djis pasobra hende no kier paga, pesey ta prefera di dump esey na Parkietenbos y riesga di pega candela y molestia tur hende den bario?
Djis pasobra no tin un ley, aworaki un ciudadano ta liber pa hiba tire bieu pa Dump sin problema.
“Pesey nos ta spera cu Ministro por traha riba e leynan pa asina stop cu bentamento di tire bieu usa na Dump,” Vermeer a bisa.
