Marjorie Vermeer ta haya cu falta boluntad politico
ORANJESTAD (AAN): E problemanan pa e habitantenan cu ta bisiña directo di e Dump di Parkietenbos ta sigui keto bay. Habitantenan a busca tur forma pa hala atencion di tanto gobernantenan local, di ingenieronan local, di expertonan local, y tambe gobernantenan na Hulanda.
Segun Marjorie Vermeer, loke nan a bin descubri cada biaha ta cu keto bay tin hopi obstaculo riba caminda pa yega na un solucion. Aunke ta haciendo yen di maniobra pa reduci e uso di Dump, door di e.o. produci energia kimando sushi, toch e resto di sushi cu ta bay den bales pa wordo dera bao tera, tin un aspecto cu ta pone esaki bira algo ilegal. Esey ta cu ley di Aruba keto bay ta prohibi pa dera sushi bao di tera.
Legislacion ta cayendo atras pa cu desaroyo di e problemanan aki. Aunke tin expertonan local ta bisa cu e proyectonan di ley ta full cla y ta djis un firma tin mester pa esaki wordo ehecuta, toch e no ta cristalizando y bira realidad.
“Loke nos falta awor aki ta boluntad politico,” Vermeer a indica. El a bisa cu tin un Ministro awor kende durante campaña a promove naturaleza y medio ambiente, y a bisa cu lo no bin mas Hotel. Pero awor a mira cu esey a ser permiti toch.
Vermeer a indica tambe cu nan kier mira mas participacion activo di Parlamentarionan den e proceso aki pa sostene e saneamento di Dump. Pasobra aunke nan a papia hopi cu diferente miembro di Staten, y cu nan ta priminti di haci pregunta riba e topico na Ministro, pero na final toch nunca bo no ta mira un contesta definitivo ta sali afo.
Ta haci un suplica na Ministro Ursell Arends pa cera e Dump. Sinta cu Ecotech pa check kico e plannan ta. Ya cu Ecotech tin hopi placa inverti y cu tin solucion pa hopi problema di procesa sushi, e ora dal bay, usa nan! Segun Marjorie Vermeer, si Gobierno reuni cu Ecotech e ta algo bon, pasobra ta Aruba ta sali beneficia na final di dje.
Marjorie Vermeer a finaliza bisando esaki den direccion di Ministro Ursell Arends: “E ta responsabilidad di abo como Ministro, por fabor, yuda nos tambe, yuda cu dump, y yuda Aruba sobrevivi”.
Nan ta pensa cu si tur sushi wordo procesa via Ecotech, tur taira di auto wordo pasa pa e sistema di proceso pa e rubbernan aki wordo desintegra na un forma mas safe na Ecotech, y cu leynan nobo, sigur lo por bay stop di benta sushi peligroso na Dump cu ta kima de vez en cuando y trece tur e bario den problema.
