Tanchi Ari ta pasa na scol e siman aki pa lesa for di su buki ‘Aventuranan di Chompi’

ORANJESTAD (AAN): Tanchi Ari ta pasa na scol e siman aki pa lesa for di su buki ‘Aventuranan di Chompi’.

Esaki ta un buki cu Ariana M. Koolman-Chririno a publica na 2025. E buki a keda ilustra pa ilustrador y diseñador grafico, Gairo Tromp.

Den dedicatorio Ariana ta skirbi: “ ‘Aventuranan di Chompi’ ta un storia cu mi ta dedica na mi nieto Ray y mi nieta Xily Koolman cu ta mi inspiracion pa skirbi otro buki pa mucha cu nan dos y nan mayornan como parti di e storia. Ta un placer di por skirbi pa nos muchanan y wordo inspira door di mucha. Danki Oma su amor chikitonan pa aventuranan hunto cu mi den mundo di literatura pa tur otro mucha tambe por lesa y gosa hunto cu nos.”

Tanchi tin un pasion pa Arte, Cultura y literatura. Y tanchi Ari ta hopi interesa den su Lenga materno Papiamento. Tanchi a skirbi un buki di poesia titula ‘Mi bahul di poema’. Y ela skirbi un storia pa e buki ‘Maraca’ pa adulto. Su prome buki pa mucha ta titula ‘E flor Tristo’.

Den trancurso di añanan Tanchi a sa di desaroya su talento den diferente area, manera musica, pintura, obra teatral, pero principalmente skirbimento, no solamente storia pa mucha, sino tambe Poesia, e.o. Haiku y Prosa cu storianan cortico.

Aña pasa Tanchi a debuta den e grandioso Festival di buki pa mucha y el a pasa hopi dushi cu e muchanan di diferente scol y e aña aki atrobe Tanchi a wordo pidi pa participa den Festival di buki pa mucha y cu hopi amor el a acepta, pa bolbe bin cu algo nobo pa nos curason chikitonan y asina hunto nos bay den e aventura di buki y lesamento.