Bululu na evento di Miss Universe ora varios candidata a sali bay como protesta

Director di evento a insulta Miss Mexico

• Hasta actual Miss Universe a lanta y tambe a sali 

BANGKOK: Un controversial comienzo pa certamen di Miss Universe 2025 na Thailandia.  Diferente candidata a sali for di e Ballroom unda tabata prepara pa instala tur candidata cu nan sjerp, despues cu e Director di Certamen, Nawat Itsarangrisil a dicidi na confronta y humilia Miss Mexico, esta srta. Fátima Bosch den publico.  E acto aki tabata hasta wordo transmiti en bibo riba e social media di Miss Universe Thailand.

   Nawat den pasado a yega di crea e certamen Miss Grand International (MGI), y despues awor a cumpra accion den e organizacion di Miss Universe Organization, y diripiente a sinti cu e por tuma mic den su man y humilia e damanan.

   Loke a socede: Nawat aworaki ta vicepresident pa Asia y Oceania di Miss Universe Organization (MOU), y cu mic den man a cuestiona e ausencia di Miss Mexico di un sacamento di potret cu sponsor cu a tuma lugar mas trempan den dia, y a hasta dune ordo pa lanta para y splica pa tur hende su ausencia riba camera.  Miss Mexico a bise cu esaki no ta e lugar pa dilanti tur hende papia asina cu ne.  Durante e intercambio di palabra, diripiente Nawat a yama e candidata como “hende dom”.  Despues cu Miss Mexico a cuminza reclama Nawat pa cu e trato cu e ta ricibiendo, e director di certamen a yama Security pa nan saca Mexico for di e Ballroom di e Hotel.

   Tur esey, siendo cu Miss Mexico nunca a insulta ningun hende, el a encanta Thailandia, y tin hopi respet.  Pero hecho ta cu nan a schedule e candidata pa un entrevista cu TV e mainta ey y pesey e tabata ausente na e sacamento di potret.

   Ora cu nan a bay pa saca Miss Mexico for di e Ballroom, un monton di candidata cu a mira loke ta pasando y ta haya cu esaki ta un falta di respet enorme pa e ser femenino, y pa Miss Mexico, nan tambe a lanta cana bay saliendo hunto pa sigui Miss Mexico.  Ora cu Nawat a mira monton di candidata a lanta para, el a cuminza grita nan “Stop, stop”.  Ora el a mira e candidatanan cuminza sali, el a duna nan ordo “Boso sinta”.  Pero nan a djis cana sali tras di Miss Mexico.

   Prensa cu tabata pafo den lobby, a mira Miss Mexico saliendo ta yorando.  Despues nan a mira con diferente candidata a sali solidario cu Fátima Bosch.

   Victoria tambe a lanta y sali: Lo mas sorprendente ta ora cu e actual Miss Universe 2024, esta Victoria Kjær Theilvig, kende algun luna pasa tabata na Aruba, e tambe a lanta para y sali bay pafo.  E momento aki a bira viral riba social media, y hopi hende rond mundo ta describi esaki como e “acto mas empodera di muhenan den historia di Miss Universe”.

   “Esaki ta encuanto derecho di muhe,” Victoria a bisa.  “Mi ta hopi sorry, nos mester haci algo mas grandi.  Nos tin respet pa tur hende, pero esaki no ta forma con tin di atende e asunto aki.  Pa papia mahos di un candidata... e ta un falta total di respet, y nota algo cu mester a ser haci.  Pesey mi a pasa man pa mi jacket y mi ta bayendo di aki.”

   Otro candidatanan cu tambe a lanta para firmemente y sali bay ta Miss Armenia, Miss Canada, Miss Palestina, Miss Bahamas, Miss Cabo Verde, Miss Spaña, Miss Belize, Miss Bolivia, y Miss Bulgaria.  Riba video por mira cu Miss Aruba tambe a lanta para, pero el a keda den e sala.

   Miss Mexico a papia: Poco rato despues Miss Mexico Fátima Bosch a regresa den lobby bek cerca prensa y a declara esaki na Ingles: “Di berdad mi stima Thailandia.  Mi tin hopi respet pa boso tur, y mi ta mira cu boso ta hendenan maraviyoso.  Pero loke boso director, Nawat, a caba di haci no tabata respetuoso.  El a yamami “dom” debi na su problema cu e organizacion, y mi ta kere cu esey no ta husto.  Mi ta kere cu mundo mester tende y mira esaki, pasobra nos tur ta muhenan empodera.  E plataforma aki ta crea pa nos bosnan resona y ningun hende tin derecho pa silencia nos.  Pa tur hende, specialmente e ser femenino, ni maske con grandi bo soñonan ta, hasta si bo tin un corona riba bo cabez, si algo ta costa bo dignidad, bo mester di sali bay.  Danki.”

   Poco despues, e organizacion Mexicano di Miss Universe, tambe a emiti un declaracion:  “Miss Universe Mexico a hisa su bos.  Loke a pasa awe cu Fátima Bosch na Thailandia ta inaceptabel.  Ningun muhe, bao di cualkier circunstancia, no merece di wordo insulta y humilia.  Nos ta kere firmemente den e balornan cu Miss Universe ta promove: Respet, dignidad, y empoderamento.  Nos sa cu e plataforma aki no a wordo crea pa dividi of degrada hende, pero pa eleva e ser femenino y duna nan e bos y voto den mundo.  E actitud di un persona cu no ta pertenece na Miss Universe no ta representa nos tan stima Miss Universe Organization, tampoco ta refleha e espirito di unidad y respet cu nos ta kere p’e.  Awe y semper, Mexico ta cu bo, Fátima.  Bo forza, bo clase, y bo bos ta representa e miho di nos pais.”

   Despues e actual Miss Universe 2024, esta Victoria Kjær Theilvig tambe a papia sosteniendo Miss Mexico.

   Mas laat, Miss Universe Organization a saca un boletin oficial, unda nan ta reafirma nan dedicacion pa respet, seguridad, y colabracion, pero nan no a menciona Nawat Itsaragrisil of elabora riba e confrontamento.   Nan a djis bisa cu tur evento y actividad planea lo sigui, “reafirmando nos meta comparti di bin cu un celebracion excepcional cu ta refleha e balor di diversidad, empoderamento, y inclusion cu ta defini e legado di Miss Universe.

   Pero a haya sa cu un delegacion di nivel-halto cu Mario Búcaro (CEO di Miss Universe), ta rumbo pa Thailandia.  “E mision ta pa coordina esfuerzonan, pa crea un ambiente safe y profesional pa tur candidata, y ta reafirma e dedicacion di MOU pa transparencia, respet, y unidad.”

   Reaccion contra Nawat: For di rond mundo ta hopi reaccion a drenta, y hendenan ta furioso pa e forma machista cu Nawat a atende cu e candidatanan.  E ta parce di no tin ningun clase di respet pa e ser femenino.  Hopi hende rond mundo a aprecia e candidata di Miss Mexico cu el a lanta sali, y nan ta aprecia totalmente e demas candidatanan cu a sostene un dama cu a caba di haya humiliacion riba camera.

   Hopi di nan a aprecia enormemente e salimento di Victoria Kjær Theilvig, y nan ta mira esey como un acto di integridad y curashi, y hopi influencer di social media a describi e momento ey como e “acto mas empodera di ser femenino den historia di Miss Universe”.

   Algun hende di Thailandia so a defende Nawat, y nan ta acusa mundo di a saca su comentarionan fo’i contexto.  Pero e video ta mustra tur cos.

   Miss Universe Organization, cu awor ta pertenece na compania JKN Global Group cu sede na Thailandia, ta sigui haya hopi critica encuanto transparencia y nan forma di trata candidatanan.  Loke a pasa aworaki ta refleha e “cultura toxico di humilia hende publicamente” dentro di e organizacion.