Pa muchanan di scol basico:
- Den cuadro di celebracion Dia Himno y Bandera
ORANJESTAD (AAN) Lyonel Dirksz, di e Comision Celebracion Dianan Nacional, den conferencia di prensa a bisa cu durante e Festival di Himno y Bandera tambe a lansa e jingle “Aruba Orguyo di Nos Tur”, cu ta un produccion di Rigel Isabella y canta pa e hoben Jessenia Martinez.
Riba e mesun poster aki por mira un code cu por scan y ta hiba bo directamente na e jingle, unda alumnonan di scol basico categoria cu ta klasnan 1de, 2de y 3de e categoria 2 cu ta klas 4de, 5de y 6de, por participa creando un baile creativo haciendo uzo e jingle aki.
Lyonel a splica cu pa esaki tambe ta bay tin un premio specialmente pa e klas cu gana y nan ta wordo invita tambe pa bin presenta esaki, dia 17 di Maart proximo, durante e manifestacion cultural.
“Esaki ta dos proyecto masha interesante cu tin e aña aki cu ta competencia di fotografia y e baile di e jingle ‘Aruba Orguyo di Nos Tur’. Pa loke ta e eventonan den bario, nos tin cu bisa cu nos a ricibi un cantidad di actividad, e aña aki, cual CCDN ta sostene varios di nan tambe. Ta bay tin evento for di Noord te na San Nicolas, cu nos a ricibi varios peticion. Nos ta mira un calendario di mas di 25 evento cu ta bay tuma lugar riba nos Isla, pero nos sa cu ta bay tin mas tambe.
Pa e motibo ey nos ta haci un peticion na tur organizacion cu tin un evento pa mand’e pa nos via flyer of por escrito riba nos e-mail adres pa asina aki nos por document’e den nos calendario cultural cu lo sali otro siman, entrante dialuna. Ora e calendario ey sali dificilmente nos por agrega mas evento riba e lista. Kiermen lo ta great pa nos por tin mas evento posible pa e calendario aki por ta completo, pa nos hendenan por bishita e diferente centronan di bario, e organizacionnan social cu ta bay tin tanto evento deportivo, cultural, feria of benta di cuminda pa e celebracion di nos Himno y nos Bandera”, Lyonel Dirksz a relata.
Finalmente, Dirksz a gradici tur esnan cu ta organizando evento y a pidi pueblo pa decora nan cas, auto, negoshi, pa asina celebra Dia di Himno y Bandera y mustra orguyoso di nos Pais Aruba.
