Debi cu salario ta stanca y costo di bida ta subi sin piedad:
ORANJESTAD (AAN) Aunke ya pa mas of menos diez aña caba nos por a capta cierto indicacion cu e clase media a cuminza merma na Aruba, sin cu por a mira preocupacion cerca gobiernonan ni sector priva, awo por constata cu enberdad esey tabata e caso y awendia bon por bisa cu e clase medio ta den “peligro di extincion”.
Un par di sindicato si a yega di trece esaki dilanti, y por corda cu ex-lider di FTA Anselmo Pontilius a yega di toca e desaroyo aki, tempo atras.
Clase media ta un status unda e trahadornan y nan famia no ta biba den luho, manera e asina yama clase halto, pero tampoco ta biba di un salario minimo ni di ayudo di gobierno pa subsisti, manera e personanan cu ta depende di bijstand.
E clase media ta e clase trahado cu estudio, cu a forma un famia, cu ta lucha pa bay dilanti, cu constantemente ta purba di escala den su ramo di trabao mediante opleidingnan cu ta yuda nan dal diferente stap pa sigui progresa y ta e grupo social cu trece ekilibrio den e desaroyo social, cu ta aporta esfuerzo na e crecimento economico y social di nos pais. Realmente, e clase medio ta hopi mas cu esaki, pero actualmente ta esun di mas afecta cu e aumento di costo di bida y menos posibilidad pa avanza financieramente.
Esaki ta e grupo di trahado unda un aumento di salario no ta conoci for di mas of menos 20 aña y no ta compatible mas cu nan calidad di trabao y e exigencianan cu doñonan di trabao tin pa nan desempeña. Esaki ta notable mas tanto den sector priva, pasobra den e caso di empleadonan publico, ambtenaarnan si ta haya aumento di salario cada tanto tempo, y algun otro beneficio acerca.
Salarionan minimo cada aña ta wordo ahusta. Salarionan medio no! E atencion di gobierno ta bay pa e personanan mas vulnerable, sin duda ni un rato cu nan merece. Loke ta sosode ta cu e escala di salario cu ta sigui (kizas den average di 3.000 pa 4.000 fls (of un tiki mas) pa luna segun e cargo) a keda den un status “quo”. E grupo aki tambe tin yiu di baby te adolescente cu nan necesidadnan basico, cu ta demanda hopi di nan mayornan. Pa nan no tin un subsidio di gobierno pa yuda nan paga crèche pa esun mas chikito, ni scol geld pa esnan di scol basico/secundario. Podise esnan cu ta sindicaliza por haya cierto alivio via un CAO, pero hopi no ta pertenece na un sindicato. Igual e costo di alimentacion, coriente, awa, gasoline, vivienda, a bira excesivo y no ta mira ni un plan na caminda pa mehora e situacion aki, no di un segmento, pero di e mayoria di nos poblacion.
