Taekwondo Team Aruba preparando pa otro competencia internacional na October

ORANJESTAD (AAN): E tabata un momento di alegria, ora cu e atletanan y nan coach di Taekwondo Team Aruba a yega Dialuna atardi cu American Airlines for di Miami.

   Famia y amigonan tabata na Aeropuerto pa asina ricibi e grupo, y por a mira e briyo di satisfaccion riba nan cara, y tambe di coachnan.

   Coach Clifford Rasmijn tabata sumamente agradecido na e sosten increible cu nan a ricibi di comunidad di Aruba, cu a aporta na nan pa asina nan por a haci e viahe internacional aki posible.

   Nan a yega Aruba cu 4 medaya di oro, y 3 medaya di plata.  Esaki a sobrepasa tur e expectativanan cu nan tabatin ora cu nan a sali pa e viahe aki.  Segun Rasmijn, e medayanan aki cu e atletanan a trece ta simbolisa e fruto di e yudansa cu henter pueblo di Aruba a sa di ofrece na nan, ora cu nan ta colecta placa riba brug di Renaissance, y tambe nan motivacion.

   Na Miami a haci un Truescore International Open & National Team Trial, unda cu nan a bay cu 4 atleta, 1 den adulto, 1 den cadet, y 2 den infantil.  Den adulto a saca 2 medaya, y den infantil a saca 2 medaya di oro y 1 silver, y den cadet a saca 2 medaya di silver.

   E atleta Shenille Perez a gana 2 medaya di oro.  E atleta Aidan Klaber a gana 1 medaya di oro.  Quinten Klaber a gana 1 medaya di oro y 1 medaya di silver.  Jethro de L’Isle a gana 2 medaya di silver.

   Despues di e campeonato aki, e atletanan lo reuni cu coach pa asina analisa kico nan a comete malo, purba drecha e erornan aki pa asina mehora aun mas.

   Segun coach Rasmijn, nan tin un competencia internacional mas di Taekwondo pa atende na luna di October, y aki lo bay cu un team grandi tambe.

   Coach Rasmijn a haya cu e atletanan di Aruba a presenta na forma sublime.  Algun pa prome biaha ta competi den campeonato na nivel mundial, y nan a sa di subi escenario sin ningun clase di miedo y ta cla pa bringa.

    Coach Yoshmar Wever tambe a manda gradici comunidad inmensamente cu a duna nan yudanza ultimo temponan na e atletanan di Taekwondo para riba brug cu nan baki di colect.  Asina a duna nan chens di bay afo y representa pais Aruba.

   E atletanan a regresa orguyoso cu e medayanan.  E ta mira cu lo bay tin aun mas cambio na caminda pa asina adelanta mihor cu e atletanan local, pa nan ta aun mihor prepara pa competencianan internacional.