Minister Wever a indica cu tin control tur dia
ORANJESTAD (AAN): Den entrevista cu Minister Geoffrey Wever el a duna di conoce cu na Ministerio di Asuntonan Economico tin un departamento encarga cu control di canasta basico (macuto di compras). El a indica cu e controladornan ta sali tur dia.
Ta publica e cifranan di e controlnan. E infraccionnan di e reglanan di e canasta basico manera supermercadonan of minimarketnan cu ta bende na prijsnan ariba e prijs permiti ta minimal. "Nos sa esaki pasobra nos ta controla nan diariamente. Miles di control ta tuma lugar pa aña y e porcentahe di infraccion, segun mi ta bao di 5%", a expresa.
E mandatario a agrega cu ta cumpliendo cu e reglanan pero tambe tin erornan humano ta sosode. Ora cu e controladornan ta constata esaki, mester cambi'e di biaha.
E ta sinti cu loke ta e control di prijs di canasta basico ta canando hopi bon. Departamento di Asuntonan Economico ta haciendo un tremendo trabao riba e tema aki, a bisa.
