Sindicato ABV ta bati alarma
- Crisis di Hospital ta wordo sinti otro lugarnan tambe
ORANJESTAD (AAN): Sindicato ABV di enfermeria na Dr. Horacio Oduber directamente no ta un “partner di combersacion” cu AZV encuanto e crisis cu ta presentando na e HOH. Esey ta loke Gina Maduro, president di ABV a declara den un entrevista.
Pero nan como Sindicato ta puntra si! Y asina ABV a bin haya sa cu Hospital a bisa cu nan a manda diferente carta, y a sinta na numeroso ocasion cu AZV pa mustra nan riba e gastonan creciente. ABV no sa si acaso AZV no kier a compronde, pero nan ta sinti cu no tin comprension cu tin un deficit den esaki. Y e ta andando pa hopi tempo, y segun Maduro, e crisis no por wordo soluciona cu adelanto (‘voorschot’).
“Te aworaki, e unico manera cu AZV ta soluciona esaki pa un par di dia ta door di duna voorschot, pero ta kit’e bek. Pues den principio, no tin un solucion awor aki pa e situacion real aki,” Maduro di Sindicato ABV a bisa.
Tanten cu no revisa e lumpsum (e suma cu AZV ta duna cada dos siman), y hisa esaki pa cubri tur e gastonan aki, bo no por draai Hospital di Aruba.
E temponan aki, trabaonan ta hopi druk na cada piso di Hospital. Pues e cuido regular, y cuido specializa, nan tur ta sinti’e, como cu ta sinti e presion tur caminda.
Segun Sindicato ABV, no ta Dr. Horacio Oduber Hospital so ta pasando den esaki, ta tur instituto di salud tin mesun problema, pues uno mas cu e otro. Por ehemplo Respaldo a cera su aña bon, pero nan mester di 4 miyon Florin pa por haci expansion. El a bisa cu ImSan tambe tin retonan pa cu fondonan pa por draai manera como debe ser.
Maduro a bisa cu tin hopi factor cu a contribui na e empeoramento di situacion, y esey ta e.o. mas persona a bin acerca, poblacion a crece drasticamente den corto tempo, tin mas asegurado cu a yega acerca, pero e lumpsum di AZV na Hospital a keda mescos. No ta dunando mas placa, y e crecimento ta 2% mientras cu gastonan ta hopi mas cu esey.
ABV ta indica cu Gobierno tin di cay den e asunto aki, pasobra segun e Landsverordening di AZV, ta Ministro di Salubridad publico tin di asumi su responsabilidad, pasobra Hospital ta den un ‘noodsituatie’. E Landsverordening ta duna tur espacio pa haci uzo di dje, y e ta permiti den ley.
“Pues no por laga instellingnan hoga, mientras cu tin un surplus den AZV”. Gina Maduro a finaliza bisando: “Si ta situacion cu no tin placa ta otro. Aki tin placa, y no por laga nos hoga”.
