Ministro di Salubridad a reacciona encuanto crisis
ORANJESTAD (AAN): Gobierno di Aruba tin atencion riba e desaroyonan relaciona cu e situacion financiero di Horacio Oduber Hospital y riba e preocupacionnan cu diferente profesional, organizacion medico y sindicato a expresa ultimamente.
Minister encarga cu Salubridad ta informa cu Gobierno ta na mesa cu Stichting Ziekenverpleging Aruba/Horacio Oduber Hospital (SZA/HOH) desde luna di juli 2026, momento cu SZA/HOH a presenta na Gobierno su preocupacionnan relaciona cu e retonan financiero.
Pa atende e situacion aki debidamente, Pais Aruba, Uitvoeringsorgaan Algemene Ziektekostenverzekering (UO AZV) y SZA/HOH a yega na un acuerdo pa realisa un analisis financiero independiente. E analisis aki lo brinda informacion obhetivo y verificabel como base pa evalua e necesidadnan financiero di SZA/HOH y pa tuma decisionnan cu ta necesario pa garantisa continuidad di cuido hospitalario.
E proceso independiente tin como meta pa brinda e claridad necesario tocante e situacion financiero. Gobierno, UO AZV y SZA/HOH ta traha conhuntamente durante e trayecto.
E Minister encarga cu Salubridad a declara aki: “Gobierno ta enfatisa cu na ningun momento e cuido por wordo perhudica. Como minister encarga cu Salubridad mi tin mi atencion ariba e asunto aki pa garantisa bon cuido di salud na nos Pais.”
