Grupo Tiki Tin Clasico di Noord ta celebra 15 aña di existencia na Aruba

Frances Figaroa:

ORANJESTAD (AAN): Grupo Tiki Tin Clasico di Noord ta celebra un momento special: 15 aña di existencia y dedicacion na bienestar di nos adultonan mayor. E grupo a ser funda bou di señor Rudy Leisner, presidente di Fundacion Movimiento ta Bida. 

Señora Frances Figaroa, coordinador di Grupo Tiki Tin Clasico di Noord, ta expresa su alegria y satisfaccion cu e trayectoria alcansa. 

“Ta cu hopi alegria nos ta conmemora e dia cu, 15 aña pasa, Grupo Tiki Tin Clasico di Noord a keda lanta. Awe nos tin 32 miembro cu ta participa den nos ehercicionan y actividadnan di movimiento na Centro di Bario Noord,” Figaroa a conta. 

E meta principal di e grupo ta pa stimula adultonan mayor pa sigui move y keda activo. Entre otro, nan ta practica ehercicionan riba vloer, compara cu yoga, pa cual cada participante ta uza un mat. E tipo di actividad aki ta rekeri suficiente espacio pa por move cu libertad y siguridad. 

Segun Figaroa, interes pa participa den e grupo ta grandi. Sinembargo, e espacio disponibel actualmente no ta permiti pa acepta mas miembro. 

“Nos espacio ta limita y p’esey nos tin varios persona riba lista di espera. Nos lo mester di un espacio mas grandi pa por duna mas adulto mayor e oportunidad di participa,” Figaroa a splica. 

Ademas di ehercicio, Grupo Tiki Tin Clasico di Noord ta organisa actividadnan social pa promove convivencia y fortalece e lasonan entre su miembronan. E celebracion di 15 aña ta un di e momentonan special organisa pa e adultonan mayor. Tambe e grupo ta celebra Pasco di Nacemento cu un cena y ta organisa actividadnan relaciona cu Dia di Himno y Bandera, dia 18 di maart. 

Aunke e actividadnan social ta limita, de bes en cuando e grupo ta organisa bustrip na unda nan ta bishita entre otro e mural di arte na San Nicolas. 

“Nos meta principal ta movimiento y keda activo, pero esey no ta nifica cu nos no ta dedica atencion na e parti social. Nos ta purba, cada tanto tempo, di organisa algo agradabel pa nos adultonan mayor, pa nan por sali, pasa un bon rato y sigui participa activamente den comunidad,” Figaroa a conclui.

Cu 15 aña di servicio, Grupo Tiki Tin Clasico di Noord ta sigui demostra e importancia di movimiento, convivencia y atencion pa bienestar di nos adultonan mayor.