Ta uzando Stadion Guillermo Trinidad sabiendo cu ainda e no ta cla

Minister Gerlien Croes ta señala:

ORANJESTAD (AAN) Den entrevista cu DIARIO, Minister Gerlien Croes, titular di Enseñanza y Deporte, a elabora tocante e proyecto di renovacion di Compleho Deportivo Guillermo Prospero Trinidad.

   El a cuminza expresando cu enberdad  ta sumamente importante, pa tin claridad riba e desaroyonan di tur proyecto, unda cu sea directamente placa for di presupuesto di gobierno ta wordo uza, pero tambe fundacionnan, y den e caso aki specificamente Lotto cu tabata financiado di e proyecto aki na inicio.

“E berdad t’asina cu e proyecto aki, nos tur sa, pa medio di declaracionnan of noticianan cu tabata tin den prensa, cu e proyecto a wordo anuncia dos of tres aña atras, unda cu den su totalidad ainda nos no tin e total, pero si un suma di siete miyon Florin a wordo inverti den e facilidad aki, for di cual 1.5 miyon a wordo saca for di Departamento di Enseñanza, pues di presupuesto di gobierno, cu tambe ta parti pa wordo inverti den e proyecto aki”, e dignatario a trece dilanti.

   El a comenta cu no ta desconoci cu na inicio di su maneho, e cooperacion p’e tabata nulo pa locual ta haya informacion encuanto kico tabata sosodiendo den e facilidad y na cierto momento el a tuma e decision di tuma tur e yabinan bek di e facilidad di e fundacion concerni, y alavez di e persona cu tabata coordinador di e minister saliente, cu tabata fungi como lider di e proyecto, pero na momento cu el a sinta na mesa cu nan, nan tabata nenga rotundamente, cu tabata tin problema cu e proyecto aki.

   Na final di y dia e mandatario a tuma e yabinan over y den un periodo di tres pa cuater luna nan a purba di haci algun trabao chikito, pa por haci factibel cu futbol y atletismo por a cuminza haci uzo di e lugar. “Y esey ta locual mi kier reitera cu mi acuerdo cu nan tabata pa cuminza haci uzo di e lugar sabiendo cu e no ta cla y cu tin hopi reto ainda pa atende cu ne”, Minister Gerlien Croes a remarca.