Ta existi preocupacion den comunidad... *Lo por tin 'gap' den cifranan real di DVG
ORANJESTAD (AAN): Testnan di Covid-19 ta wordo bendi na botica aki na Aruba. Esaki kiermen cu cualkier persona por cumpra un test 'over the counter', anto ta permiti nan bay cas facilmente mescos cu un test di embarazo.
Relaciona cu esaki, tin basta hende preocupa pa motibo cu esaki ta trece cu ne cu no tin control mas riba cuanto hende realmente ta canando eyfo cu Covid-19 sin cu e casonan aki ta wordo registra na Departamento di Salud (DVG).
Esnan cu ta bay botica pa cumpra e test di Covid (swab test) no ta wordo pidi pa raporta e resultado. Si ta negativo of positivo. Nan no ta haya niun recomendacion riba kico pa haci den caso cu nan resulta Covid-19 positivo, den e pio di e casonan. Alomenos, esey ta locual a wordo raporta na DIARIO.
E situacion aki ta trece un preocupacion relaciona cu e eficacia di e sistema di vigilancia na Aruba.
Departamento di Salud ta raporta e cifranan di Covid-19 riba un base diario. Esaki ta e resume di casonan positivo y e casonan activo. Ademas di otro datonan manera e cantidad di esnan recupera of e casonan di fayecimento.
Pero awor ta surgi e interogante, kico ta pasa cu e casonan di e personanan cu a bay botica pa cumpra un test y cu e resultado a resulta positivo?
Ta nifica cu lo por tin un 'gap' pa loke ta e cifranan real di Covid-19 na Aruba? Esaki ta e ora cifranan cu DVG ni Crisis Team no ta hayando den nan sistema.
Kisas aki ta trata di casonan unda tin personanan cu tin miedo di bay DVG (docter di cas) pa haci un test, siendo cu esaki ta te hasta gratis. Pero nan ta prefera di paga un suma na botica omitiendo e parti di nan deber civico di raporta nan mes como un caso positivo y mas pio ainda di no aparece den e sistema di vigilancia di malesanan contagioso aki na Aruba.
Reaccionnan cu DIARIO a haya ta mustra cu ta existi un preocupacion hopi grandi mirando cu hopi di e personanan aki ta bay riba caya, den hende, sin tene cuenta cu nan a resulta positivo y te hasta nan ta bay traha sin informa nan doño di trabao di nan condicion.
Den e caso aki, lo ta na su lugar pa Departamento di Salud informa comunidad kico ta e maneho relaciona cu e casonan aki.
No por ta posibel cu ta sigui pone otro personanan den risico di wordo contagia. Esaki sigur ta un asunto cu mester di atencion urgente.
