Minister di Finansa ta informa:
ORANJESTAD (AAN): E siman aki Minister Maduro di Finansa a haya un update di su ekipo di profesionalnan di e trabounan cu ta wordo haci den cuadro di tema A di e Landspakket cu ta contene e trabounan pa mehora maneho financiero di Pais Aruba.
E trabounan aki ta necesario pa asina Pais Aruba pa prome biaha por conta cu un declaracion di un accountant cu ta verifica cu e cifranan presenta den e Cuentanan Anual di Gobierno di Aruba ta corecto.
Pa Aruba por yega na e declaracion special di accountant riba e Cuentanan Anual di Aruba di Aña 2026, ta necesario pa awor aki haci algun cambio den e maneho presupuestario, capacita y renumera e personal financiero di Pais Aruba, cambia algun regulacion financiero y implementa maneho nobo pa subsidio, participacion y dividendo.
Na e momentonan aki tin varios investigacion y implementacion tumando luga riba cada un di e puntonan aki di atencion, sinembargo e mandatario di finansa kier enfatisa cu pa por yega na e declaracion special di accountant pa Cuentanan Anual 2026 y logra e implementacion efectivo di e reformanan necesario di e Landspakket, ta hopi importante pa duna prioridad na e trabounan pa mehora e maneho financiero di Pais Aruba. Un bon bista riba e finansa di Gobierno, ta yuda e proceso presupuestario grandemente y ta duna bista unda tin espacio financiero pa asina por ehecuta e reformanan na bienestar di comunidad.
Den e tempo nos dilanti Minister Maduro lo brinda informacion mas detaya riba e cambionan cu ya caba ta wordo implementa y ki pasonan mas falta pa wordo tuma pa asina por pa mehora e maneho financiero di Pais Aruba y tambe por yega na prome biaha den historia di Pais Aruba na un declaracion special di accountant di e Cuenta Anual 2026 di Pais Aruba.
