Segun Michella Croes di Fundacion Zinnia:
ORANJESTAD (AAN): Michella Croes di Fundacion Zinnia ta uni na e sentimento di tristesa cu e situacion di tanto accidente fatal di trafico den e prome simannan di aña 2026. Mayoria di e accidentenan a ser ocasiona door di uzo di alcohol mientras ta stuur auto. Segun e, Aruba mester busca solucion pa esaki mas lihe posibel, y segun el a menciona den un entrevista cu DIARIO, mester haci esaki door di cambia ley di boet y castigo.
Fundacion Zinnia desde cu a keda institui 10 aña pasa, ta treciendo campañanan di conscientisacion. Segun señora Croes, ta riparabel cambio den hopi ciudadano pero tambe pa cierto grupo y salimento, e situacion ta empeora.
Esaki, segun señora Croes, ta un indicacion fuerte cu mester aborda e situacion, intensifica control di polis cu mas material y personal y modifica leynan cu ta anticua. Mester haci castigonan mas fuerte y hisa boetnan pa asina ciudadanonan iresponsabel por sinti esaki mas den nan cartera.
Señora Croes a remarca cu actualmente ta hopi importante cu hopi organisacion y fundacion ta pensando riba e mesun causa. Mester uni cu otro, lagando opinionnan un banda y traha hunto pa un solo causa cu sigur lo duna miho resultadonan. Esaki, sigur lo pone presion tambe riba Gobierno di Aruba.
