Sismo di 3.0º riba Scala di Richter
ORANJESTAD (AAN): Tabata Dialuna atardi pa exactamente 3:17 pm, cu diferente persona riba e isla a sinti movimento. Algun a sinti comosifuera ta un truck pisa ta pasando den nan bario, ta tril e lugar.
A resulta cu ta un temblor a keda registra e momento ey. Su epicenter a wordo localiza na 12.06º Nort, y 69.81º West. Esaki ta den lama, hopi cerca cu oriya na Venezuela.
Esey ta exactamente 40 km Zuid-Zuidoost di Baby Beach na San Nicolas (Aruba). E ta igual cu 56 km Zuid-Zuidoost di Wilhelmina Park na Oranjestad (Aruba). Esey ta igual cu 76 km West-Zuidwest di Playa Hulu (Corsow).
Tambe e epicentro ta igual cu 25 km Zuidoost di Cabo San Roman na peninsula di Paraguana (Venezuela). E ta igual cu 5 km pariba di Playa Tiraya na peninsula di Paraguana (Venezuela).
E temblor tabatin un magnitud di 3.0º riba Scala di Richter. E centro di e temblor a wordo localiza na 12,9 km bao superficie. Esaki ta e motibo pues di con el a wordo sinti te na Aruba.
Informenan cu a drenta na Aruba ta di hendenan cu a sinti movimento, a tende e boroto. Pero ningun informacion a drenta di daño material.
