Chiropractor Renato Van Putten:
ORANJESTAD (AAN) -- Den su entrevista cu Matutino DIARIO, Chiropractor dr. Renato van Putten, a pone acento riba e tema di sedentarismo,
pa mustra nos comunidad cu esaki ta un aspecto negativo di e estilo di bida di hopi di nos ciudadanonan, y cu falta di movecion, oranan sinta, pues, un bida sedentario ta mas peligroso cu humamento mes.
“Mi ta kere cu e problema mas grandi awendia ta bin pa falta di movecion, sedentarismo, sinta hopi, y esey ta hopi peligroso pa nos salud.
“Nos cultura Arubiano ta hopi sedentario, nos ta bay traha, ora nos ta bay cas ta come, bebe, drumi. Ehercicio no ta un parti di esey. E problemanan di lomba mi ta di opinion cu 70% ta bo estilo di bida; 30% ta bo herencia. Pues, 70% no ta haci ehercicio y no ta move.
Tin pashentnan ta bisa mi cu nan ta bay gym dos biaha pa siman, pero ta sinta 10 ora pa dia. Cu dos biaha pa siman bay gym bo no ta bay logr’e. E bida sedentario, e sintamento, ta bira mas peligroso cu humamento. Hopi hende ta muri door di sinta mucho, mas cu hende cu ta huma”, Chiropractor Renato van Putten a remarca.
Tin mas informacion valioso cu Renato a trece dilanti, cu DIARIO lo comparti , como un bon aporte, na nos comunidad.
