Lider di Partido MEP Evelyn Wever - Croes:
*Mientras ta warda riba decision di Conseho di Minister di Reino
ORANJESTAD (AAN): Diabierna 21 di oktober tin riba e agenda di Rijksministerraad / Conseho di Minister di Reino e tema di aanwijzing pa Aruba. Lider di Partido di MEP Evelyn Wever - Croes a duna un update breve di e trabounan haci desde principio pa evita e aanwijzing.
Lider di Partido Wever - Croes a splica cu a cana diferente trayecto y un di esakinan ta cu a entrega e ‘zienswijze’. Zienswijze ta encera con Aruba ta defende su mes contra di e aanwijzing. Aruba su defensa ta hopi huridico pero e tin contenido tecnico y financiero tambe. ‘Segun mi humilde opinion, huridicamente, un aanwijzing aworaki no ta posbel, Lider di Partido Wever - Croes, a expresa.
Ta importante pa menciona cu a sigui traha riba baha gastonan aun mas, cual a conduci na e deficit manera cu a entrege den e cambio di presupuesto cu ta bayendo Parlamento, di 227 miyon florin pa 148 miyon florin. Mientras cu e ta canando su caminda (awor pa Raad van Advies), a logra baha e deficit aun mas, pues e ta rond di 112/113 miyon florin. Esaki ainda no ta riba papel pero e lo bay Parlamento den un nota di cambio.
Asina Lider di Partido Wever - Croes ta mustra con ta trahando duro pa baha e deficit mas, pa asina no tin niun motibo pa haya e aanwijzing. Awor lo mester warda te cu diabierna pa mira kico ta bay pasa.
