Eleccionnan Midterm na Merca di influencia riba Guera Ukraine
*Frontera entre Venezuela y Aruba no por habri den crisis
* Situacion financiero mundial ta crea caos politico internacional
ORANJESTAD(AAN)- Na ciere di e edicion di awe, DIARIO a ricibi relatonan sumamente preocupante entorno e situacion mundial, cu ta bira mas severo mientras e eleccionnan Midterm na Merca ta acerca.
E eleccionnan aki no ta pa eligi Presidente na Merca pero ta pa eligi, manera na diferente occasion DIARIO a informa, 425 miembro den e House of Representative y 35 di e 100 miembronan di Senada di Merca.
Esaki ta nifica cu na e momentonan aki Merca ta den un situacion di eleccion y e desaroyonan na Ukraine por afecta e resultadonan manera informantenan ta indica.
Informacionnan serio a alcansa DIARIO acerca e presencia di Iran na Venezuela, caminda Iran lo tin un refineria nobo.
Iran ta un aliado directo di Vladimir Putin y ta wordo considera di ta hunga un papel importante den e armanan poderoso cu cual Putin ta trata na kibra e resistencia di Ukraine contra e invasion Ruso.
E situacion mundial ta empeora na forma directo y indirecto continuamente y na varios pais por nota cu e problemanan social, manera cantidad di personanan cu ta sufri di hamber, ta causa agitacion contra gobiernonan di e pais.
Por papia di un instabilidad mundial serio ayeranochi ora DIARIO tabata pa bay imprenta.
Manera a wordo trece dilanti, Prome Ministro Evelyn Wever-Croes a tuma e decision corecto pa no habri e frontera entre Aruba cu Venezuela debi na e aumento di personanan cu ta establece nan mes na Venezuela procedente di paisnan cu por considera peligroso.
Venezolanonan mes ta sigui bandona nan pais tambe y por spera cu e actividadnan pa yega Aruba na forma ilegal, lo aumenta.
DIARIO ta pendiente momentonan serio den e conflicto mundial, cu ta crea hamber y miseria grandi rond mundo pero tambe instabilidad peligroso na cantidad di pais, caminda poblacion ta lanta pa prijs di awa y coriente cu ta sigui subi, fuera di control di Gobiernonan di paisnan cu mester importa combustibel.
