Anualmente mester presenta un bista completa riba desaroyo
*E base financiero democratico di e pais a wordo kibra ayera
* A introduci sancion contra gobernantenan cu abusa di placa?
ORANJESTAD(AAN)- Ora papia di recesion mundial ta papia di un tempo den cual e ciudadano rond mundo lo enfrenta problema serio.
Na e momentonan aki ya ta un problema pa hopi hende pone cuminda manera nan a costumbra riba mesa mientras hopi ta puntra nan mes con nan mester sigui cu gastonan den futuro.
E peso di Aruba ta keda su peso di belasting, cu a wordo historicamente introduci como e fondonan cu Pueblo ta entrega gobernantenan, pa cu aprobacion di Pueblo, nan gasta.
Si awe tanto Arubiano ta den problema serio, no ta solamente pa motibo di e crisis mundial pero tambe pa e hecho, cu Aruba a bira un pais di gastonan halto pa e ciudadano y tur sector, pasobra e contribucion cu mester paga pa e comunidad por funciona, a bira demasiado halto.
Den e situacion actual ningun hende por priminti ningun hende nada, pasobra ningun hende ta na haltura kico lo pasa concretamente na mundo riba termino cortico of largo.
Un cos ta sigur, cu e temponan nos dilanta lo ta dificil manera ta keda presenta rond mundo.
Aruba, ademas di pandemia y guera di Ukraine mara na e Guera di Petroleo, tin un peso cu a wordo crea pa e Arubiano, ora gobernantenan a abusa di nan poder y a abusa di placa di Pueblo, cu a wordo completamente despista.
Pakico Aruba mester paga tanto belasting?
Democracia a faya ayera ora Parlamento di AVP a entrega na Gobierno Mike Eman e placa di Pueblo pa e spart manera e tabata hiba di gusto.
Esaki ta e gran berdad.
E Parlamento di Aruba den pasado a dicidi cu e ta bay contra su motibo di existencia cu ta controla Gobierno y evita cu placa di Pueblo ta wordo abusa manera a socede durante e periodo di 2009 pa 2017, cu a destrui Aruba.
Bofon a wordo haci di Pueblo cu a wordo invita dor di ex Prome Ministro Mike Eman pa awe paga loke e mester paga na belasting cu “orguyo”.
Den un tempo di tension mundial enorme, ta facil cera wowo pa pasado cu ta nos mihor maestro.
Pero mester haci Husticia cu Pueblo. Mester splica Pueblo con a deshaci di e oportunidad pa evita cu den futuro atrobe lo surgi un Mike Eman, cu ta abusa di su poder y cu sosten di su mayoria den Parlamento ta crea un desaster pa Aruba paga.
Cuanto Aruba a paga di e totalidad di debe di PPP, cu ta e forma pa a kibra ley cu ta exigi Parlamento controla e placa di Pueblo cu ta wordo gasta dor di un gobernante?
Democracia financiero ta exigi pa Parlamento mira kico Gobierno ta gasta pero e exigencia aki a wordo geschrap cu e proyectonan di 1.6 Biyon cu a bira mucho mas.
Periodicamente Aruba mester wordo informa cuanto el a paga y kico mas e mester paga di e proyectonan aki, cu ta contra e institucion di Parlamento cu semper mester ta e controlador cu Pueblo a eligi pa lucha pa bienestar di Pueblo cu a bira obheto di bofon di Mike Eman, cu ta e gobernante responsabel pa e dolor financiero di Aruba den un crisis mundial cu ta topa cu un sin defensa financiero.
