Tocante e peligro di e figuranan 'Huggy y Kissy' via rednan social:
ORANJESTAD (AAN) – Rubiella Toppenberg, Trahador Preventivo na Fundacion Anti Droga Aruba (FADA), den entrevista cu DIARIO tocante e figuranan 'Huggy Wuggy' (color blou) y 'Kissy Missy' (color roos) cu ta circula y aparece diripiente, via social media, y cu ta manda mensahenan horible y siña mucha chikito con pa mata nan mayornan, a comenta cu ta responsabilidad di cada mayor pa tuma e yamada cu docentenan ta haciendo na nan, via chat, telefon, etc., hopi na serio.
E docentenan cu ta lanzando e advertencia aki no ta haci esaki por nada, pero nan ta mirando cu e alumnonan na scol ta papiando riba esaki den klas y den pause. E maestronan ta poniendo alerta no solamente e directornan di scol, pero e mayornan sigur pasobra nan no kier pa e muchanan wordo perhudica na ningun forma.
“Mayornan, por fabor wak kico boso muchanan ta bezig cune, si nan ta riba social media. Nos no por kita nan for di e mundo moderno pero si por controla ora nan ta wak plataformanan social, pa tin un hende grandi den cercania y si nan wak algo robes, di biaha por atende cu e situacion. Pero si e mucha ta su so den su camber, cu television henter dia y e cosnan aki ta aparece, nan e ta bay scuche”, Rubiella a señala.
E ta pidi mayornan pa ora muchanan ta bin cas for di scol, sinta un rato cu nan y papia tocante e peligronan di e figuranan menciona, pa asina nan tambe ta informa.
E hoben a subraya cu mester tene na cuenta cu no tur mucha ta bon balansa cu nan salud mental, y tin cu tine un tiki mas dificil cu otro; tin mucha cu ta pasando den situacionnan menos bunita cu otro, y no tur ora e relacion cu mayor ta perfecto.
“Anto, kico ta pasa? E hendenan ta inventa e tipo di cosnan aki specificamente pa e muchanan cu, por ehemplo, ta sinti nan mes abandona y neglisha pa nan mayornan, y e cosnan aki por hiba e mucha na haci algo cu, eigenlijk, e no ta suppose di haci. Hopi biaha, nos ta warda algo pasa pa e ora ey nos tuma e stap pa haci algo, y no ta pasobra esey ta pasa afo kiermen cu no ta bay pasa akinan. Nos tin cu corda cu e influencia di e mundo digital ta hopi fuerte riba nos muchanan, pues ta hopi importante pa nos papia cu nan, informa nan pa nan no bay haci cosnan robes”, Rubiella Toppenberg a conclui.
