ORANJESTAD (AAN) – Edwin Jacobs, director di SVb, a sigui splica, den conferencia di prensa, cu manera Omicron a drenta,
esey a stroba momentaneamente, e recuperacion economico di Aruba y SVb a añadi un tempo extra mas aden, den locual ta nan eskema oficial, pa pago di subsidio haya di mas.
Esaki den caso cu e compania, ora cu haya su cobranza, e manda bisa SVb cu e no ta kere cu por pag'e. SVb ta manda ofrece, e ora ey, algo adicional.
“Si esnan cu tabata bao mil nan a haya un areglo di pago pa den dos luna y nan ta manda bisa nos cu nan no por pag'e, SVb ta manda bisa nan cu nan ta haya tres luna pe. Si esnan cu a haya 18 luna, nan ta haya cinco luna mas acerca si nan bisa nos cu nan no por pag'e den esey. Esaki ta pa facilita un areglo di pago. Nos ta papiando akinan di casi dos mil empresa y nos mester automatiza e proceso mas hopi posible”, director di SVb a señala.
El a agrega cu ainda despues cu nan ta duna e companianan aki, e extra tempo ey pa paga bek, y nan ta bisa cu nan no por paga nan por haci peticion pa nos determina nan capacidad di pago. “Pero e capacidad di pago no ta e compania ta determina esey. Nos tin nos forma cu nos ta uza caba pa primanan di aseguro di malesa y accidente, con nos ta calcula e capacidad di pago. Pa cu esey, e empresa tin cu duna nos algun informacion esencial pa nos por determina, realmente, su likidez den tempo, of determina kico nan por paga nos”, Jacobs a indica.
El a agrega cu pesey SVb ta pidi nan estado di cuenta bancario cu bista riba e ultimo seis lunanan, un lista di debe cu e compania tin actualmente, debenan habri y compromisonan, nan ta pidi tambe un bista di administracion, locual nan a cera cune aña 2019-2020 y si tin 2021 tambe, y un proyeccion di e “cash flow” di e compania di 2022 y kizas 2023 tambe.
“Nos tin idea kico e compania tin na likidez caba, kico e ta bay expect cu ta bay haya na likidez door di benta, kico ta su gastonan di administracion y di personal, anto e ora eynan bo ta wak kico ta keda na likidez cu di e suma aki nos ta kere cu bo lo por paga. Esaki ta un full un trayecto largo pasobra nos mester di tur e informacionnan aki, y e ta tuma tempo”, Edwin Jacobs a conclui.
