Consul di Colombia na Aruba Gustavo Serrano Amaya:
ORANJESTAD (AAN) – Consul di Colombia na Aruba, Gustavo Serrano Amaya, ta haci un yamada na tur ciudadano Colombiano cu ainda no tin cobertura di AZV pa registra pa e di dos campaña di salud oral cu e Consulado ta organisando na Aruba.
Segun Serrano Amaya, e iniciativa ta dirigi principalmente na Colombianonan cu a logra regularisa nan status, pero cu ainda no a logra afilia na AZV. E grupo aki no tin acceso na e beneficio di cuido dental via AZV, motibo pa cual e Consulado a organisa e campaña.
“E servicio ta completamente gratis y ta dirigi specialmente na esnan cu ainda no tin e posibilidad aki,” e consul a indica.
Pa e campaña, Consulado Colombiano na Aruba a firma acuerdo cu dos clinica dental na Aruba, unda e participantenan lo ricibi un limpieda dental sin costo.
Personanan interesa mester completa un formulario di inscripcion online. E link pa registra ya ta disponibel riba e pagina di Facebook di Consulado di Colombia na Aruba. Despues di completa e formulario, e solicitante lo wordo contacta pa coordina un cita na un di e clinicanan participante.
Consul Serrano Amaya a recorda cu pa e campaña di salud oral tin un total di 500 cupo disponibel. P'esey, e ta recomenda pa interesadonan registra mas lihe posibel.
E campaña ta forma parti di e esfuersonan di Consulado di Colombia na Aruba pa sigui apoya bienestar y salud di e comunidad Colombiana residente na e isla, particularmente esnan cu ainda no tin acceso na e sistema local di seguro medico.
