Sindicatonan a reuni den un sesion informativo tocante HOFA-LWHO

Presidente di FTA, Hose Figaroa:

ORANJESTAD (AAN)-- Presidente di Federacion di Trahadornan Arubano (FTA), mr. Hose Figaroa, a duna di conoce den un entrevista cu Matutino DIARIO, cu dialuna mainta, conhuntamente, e sindicatonan tabatin un sesion informativo tocante e tema di HOFA, y cu hopi satisfaccion el a bisa cu e sala tabata completamente yen, y cu practicamente, tur sindicato a haci acto di presencia y mas di e miembronan di directiva.

“E intencion di e encuentro ta pa tur directiva, en general, di tur sindicato haya informacion tocante e tema di HOFA, unda nos tabata ta, di unda HOFA a bin, unda nos ta aworaki pa cu HOFA, kico ta su contenido, y kico ta unda nos kier bay cu HOFA”, Hose Figaroa a duna di conoce.

E sindicatonan pa lunanan caba tin un posicion tocante esaki. “Un posicion cu a wordo duna mas forza, sigur cu e ultimo conseho cu a sali di Raad van Advies di Aruba, unda tambe ta riba mesun linea cu e ultimo parti di e pensamento sindical. P’esey nos a bin hunto y aworaki tambe nos a trata un poco kico tabata e conseho di Raad van Advies, y kico ta e proximo pasonan cu nos di e sindicatonan lo bira tanto pa e asunto aki di HOFA, pero tambe cu e LWHO (Landsverordening waarborging houdbare overheidsfinancien), cu ta mara na dje”, Presidente di FTA, mr. Hose Figaroa a señala.