Ta prohibi pa bende of duna productonan di tabaco na personanan bou di 21 aña y pa bende sigarianan los

Lesa mas riba e ley cu ta limita e uzo di productonan di tabaco

ORANJESTAD (AAN): Manera ya caba ta conoci, Aruba lo bay conoce e implementacion di “Landsverordening Beperking Tabaksproducten (AB 2016 no.41)”, e implementacion di e ley ta drenta na vigor dialuna 2 di mei 2022. E ley aki ta un ley cu a keda aproba unanimamente den Parlamento di Aruba di 26 di october 2021. E ley aki ta bay prohibi tur menornan di 21 aña pa cumpra, uza of pa traha den areanan cu ta bende productonan di tabaco.

            Den cuadro di e plan nacional di prevencion Ministerio di Salud Publico conhuntamente cu Departamento di Salud Publico ta dedica na mehora e calidad bida, servicio y salud di Aruba su comunidad. E ley cu ta limita e uzo di poductonan di tabaco ta un di e aspectonan importante den Aruba su plan nacional di prevencion den salud. E ley ta importante, mirando cu uzo di sigaria ta dañino no solamente pa persona cu ta huma cual ta 13% di e populacion di Aruba riba 20 aña, pero tambe pa esnan cu ta den cercania.

Productonan di tabaco ta ensera: sigaria, shag, siga, tabaco di pipa (Pijp tabak), tabaco di kauw (pruim), tabaco di puiro (snuiftabak), hookah (waterpijp), sigaria di yerbe (kruiden tabak), tabaco sin nicotina, sigaria electronico (e-sigaret) y pen di hookah (shisha pen). 

Articulo 6: Ta prohibi pa bende of duna productonan di tabaco na personanan bou di 21 aña

            Den articulo 6 di e ley di tabaco ta stipula cu no ta permiti pa bende personanan menor di 21 aña productonan di tabaco. E articulo aki tambe ta prohibi pa e bendedor di productonan di tabaco ta menor di 21 aña, kiermen unda ta bende e producto di tabaco mester ta separa. Productonan di tabaco mester ta poni na lugar cu no ta accesibel directo pa publico. Segun articulo 6 mester tin un borchi cu ta bisa cu ta prohibi pa bende sigaria na menor di 21 aña.

            Articulo 6 ta pa promove salud, crea concsientisacion no solamente na e adulto pero tambe na e muchanan. Di e manera aki e muchanan mes por informa nan mayor y consciente cu nan no ta permiti den un seccion specifico caminda benta di tabaco ta tuma lugar. 

Articulo 6A: Ta prohibi pa bende sigaria los

            Den articulo 6A di e ley di tabaco ta stipula cu no ta permiti pa bende sigaria los, sigaria mester wordo bendi den paki cera y seya. E articulo aki ta proteha e cumprado ya cu ora ta bende sigaria los e posibilidad tey cu nan por manipula e sigaria. 

Articulo 6A-1: Prohibi pa parti productonan di tabaco gratis

            E idea tras di articulo 6A-1 di e ley di tabaco ta pa prohibi e mercadeo di productonan di tabaco caminda personanan por ricibi e productonan aki gratis

            Tur e 3 articulonan aki ta bay keda controla pa Dienst Warenkeuring en Higiëne (DWH) y lo bay tin un multa pa incumplimento di e articulo nan aki cu ta den e ley di tabaco.

            Un otro punto importante pa menciona ta cu na momento di pidi un “ontheffing” ta manda un carta pa Minister di Salud Publico. E compania lo tin e ora un aña unda e compania ta wordo considera cu nan tin e “ontheffing” caba.

            Den e un aña aki Ministerio di Salud Publico lo evalua, conforme e rekisitonan si e compania ta bin na remarke pa haya e ontheffing si of no. Pa mas informacion riba e ley di tabaco cu ta drenta na vigor dialuna dia 2 di mei. Pa mas informacion por tuma contacto libremente cu DVG.