Reino ta recorda awe y mañan e dos caranan opositor di hende --- *Na 1969 veteranonan a simula D-Day pa por splica e berdad --- *E matansa di victima inocente y e grito di triunfo di libertad
ORANJESTAD(AAN)- “Homo homini lupus est” (hende ta lobo pa hende). Un realidad cu ta bini dilanti awe na Ukraine, cu a bira victima di e mente abusador di Vladimir Putin cu pa poder ta destrui Ukraine pa e bira doño di patria di hende cu e ta asesina sin piedad.
Un escritor Hulandes ta cuestiona cu hende ta bira lobo. Jacques Presser den su obra “De Nacht der Girondijnen” ta bisa cu “Homo homini homo est” (hende ta hende pa hende).
Den un storia e ta enfrenta hende cu realidad di diferente cara di hende cu ta forma historia humano.
Ora Reino dia 4 di Mei haci nos para keto na e dolor di guera y recorda e victimanan, e cara cruel di lobo di hende ta bini dilanti. E ta ataca y ta mata sin piedad.
Dia 5 di Mei Reino ta pone nos recorda e prijs cu heroenan a paga, pa debolbe hendenan completamente desconoci pa nan persona, nan libertad.
Hende ta e centro di mundo. Awe pa realisa kico ta pasa cu mundo, mester atende cu loke hende ta capaz di haci cu hende y cu mundo.
Awe na Aruba nos ta corda riba Miyones di hende manera e Arubiano Boy Ecury, cu a bira victima di Segundo Guera Mundial.
Hitler no tabata conoce su victimanan. Su hamber pa poder a bira odio contra hende inocente, cu mester a entrega soldatnan di Hitler nan tera, nan cuminda, tur loke nan tin pa despues wordo mata dor di un disparo of hiba un campo di concentracion caminda dignidad di hende a muri na man di asesino.
Hitler a crea odio contra Hudionan y tur rasa cu no tabata coresponde na e super hende cu e tabata pinta na su soldatnan cu a lobo den servicio ciego di Hitler, cu awe por reconoce den Vladimir Putin.
Interesante ta cu tanto Adolf Hitler como Vladimir Putin tabata yama nan mes socialista, cu a ciego hende cu creacion di nan imperio.
Awe mundo ta comprende kico realmente ta pasa na Rusia?
Pa comprende e horor di guera, pa comprende e dolor di Ukraine, mester scucha veteranonan cu na 1969 pa prome bez a reuni atrobe na Normandie pa simula D-Day, e momento cu nan a yega Europa pa enfrenta Hitler.
25 aña despues di D-Day nan a reuni di Canada, Merca y Inglatera na e costa di Francia pa splica mundo dolor di guera y e triunfo di libertad riba guera.
Nan a sigui e ruta di Segunda Guera Mundial pa yega Alemania y asina a alcansa tambe ciudadnan na Hulanda, caminda nan entrada pa libera Hulanda a wordo simula na tur parti di e pais.
4 di Mei y 5 di Mei a haya contenido special ora personanan cu a sobrebibi guera mundial na tur ciudad y aldea, a reuni pa saluda e veteranonan cu a representa e otro cara di hende, e cara di libertad, di paz, di husticia pa hende inocente.
Storianan di Segunda Guera Mundial a wordo rebibi cu “Oranjebitter” cu tin su base den Jenever, cu tabata yuda e aliadonan sigui cana pa den condicionnan horibel di tempo, libera hende inocente di hende cu a bira lobo.
Despues di 1969 na otro ocasionnan e veteranonan a ripiti nan encuentronan cu nan mes pero tambe cu tur cu a conoce Segundo Guera Mundial pero tambe hende cu no por comprende guera, si nan no papia cu hende cu a biba cu guera.
Durante Segundo Guera Mundial e refinerianan di Aruba y Curacao a sirbi pa sostene liberacion di Europa. Bida di Arubianonan tabata na peliger.
Awe e guera di Ukraine ta exigi esfuerso, solidaridad cu e Pueblo di Ukraine, cu ta victima cu un lobo yama Vladimir Putin y un pueblo ciega.
Mescos cu a pasa durante Segun Guera Mundial, hende a perde tur balor, na man di hende cu a bira asesino y ladron.
Cu alegria ta horta pertenencia y cuminda di victimanan inocente, abusa di muhernan, homber y mucha.
4 di Mei. Hulanda ta recorda victimanan di guera cu a muri ora hende a bira lobo pa hende. Dia 5 di Mei lo recorda e triunfo di fin di Guera Mundial, triunfo di hende cu tabata tin e curashi di destrui cadena y enfrenta morto pa libertad.
