‘Ta preocupante cu consumo di alcohol bao di hobennan ta practicamente socialmente acepta’

‘Ta preocupante cu consumo di alcohol bao di hobennan ta practicamente socialmente acepta’

Minister Wyatt-Ras:

ORANJESTAD(AAN): Durante e Vierlandenoverleg riba Salubridad Publico cu a cuminsa Diahuebs na Aruba, a mustra un video di e campaña di prevencion yama ‘Nothing Nada Nix 18’, desaroya hunto pa e paisnan di Reino. E campaña ta pa trece mas concientiacion riba e prohibicion di bebe alcohol pa esnan bao di edad di 18 aña.

   E campaña ta mustra riba e hecho cu alcohol por causa problemanan na e cerebro di esnan cu ta consumi esaki, specialmente na un edad hoben.

   Durante e conferencia na Embassy Suites, e minister y representantenan di tur e paisnan di Reino presente a wordo puntra nan opinion riba e campaña di no bebe prome cu 18 aña.

   Minister di Salubridad di Aruba Mervin Wyatt-Ras a trece dilanti cu na Aruba consumo di alcohol ta halto. El a splica cu a haci un encuesta varios aña pasa cu ta mustra cu 70% di hoben na Aruba ta consumi alcohol. Segun e minister, ta hopi importante pa haci algo riba esaki.

   “Durante mayoria evento social, hobennan y adultonan hoben ta wordo confronta cu alcohol y lamentablemente esaki te hasta ta socialmente acepta”.

   Esaki ta pone cu e ta algo bastante preocupante den nos comunidad, segun Wyatt-Ras.

Minister Hulandes di Cuido di Largo Plaso Mirjam Sterk na su turno a trece dilanti cu su preocupacion grandi ta cu e hobennan no ta realisa e impacto cu consumi di alcohol tin den nan cerebro.

“Pesey mi gusta e parti di e campaña aki cu ta enfoca hopi riba e efectonan hopi negativo cu consumo alcohol tin riba nan cerebro”.

Den ultimo añanan nos a haya sa mas di e efectonan negativo y pesey mester enfoca pa concientisa tur hende riba esaki, segun Sterk, kende a indica cu consumo di alcohol ta causa otro problemanan tambe manera adiccion y bandona educacion.