DAS ta uni na Orange the World cu tayernan riba diferente topico di conscientisacion

DAS ta uni na Orange the World cu tayernan riba diferente topico di conscientisacion

Marceylaine Paskel:

 

ORANJESTAD (AAN) Orange the World ta un campaña internacional cu ta tuma luga cada aña di 25 di november te 10 di december. Durante e 16 dia di activismo, e campaña ta pone atencion riba violencia contra hende muhe y mucha muhe. E meta ta pa conscientisa comunidad pa reconoce señalnan di violencia, brinda sosten na esnan cu ta enfrenta e situacion aki y contribui na un sociedad unda tur hende por biba sigur.

   Departamento di Asunto Social (DAS) ta sostene e campaña y ta promove conscientisacion y prevencion di violencia contra hende muhe y mucha muhe. PR di DAS, Marceylaine Paskel a enfatisa cu DAS ta reafirma su compromiso cu e causa door di brinda sosten y guia na comunidad di Aruba mediante su servicionan diario y traha hunto cu instancianan y organizacionnan cu tambe ta dedica na e lucha aki.

   Paskel a expresa cu DAS ta orguyoso di por prepara varios tayer pa un grupo specifico, den colaboracion cu Stichting Ja Ik Aruba, Heart Centered Leadership Foundation, Fundacion ADRA y Filomena College MAVO. Entre e temanan cu lo trata ta relacionnan saludabel, respet mutuo, limitenan personal y violencia.

   Paskel a gradici tur esnan cu ta contribui na realisacion di e tayernan durante e periodo di Orange the World. El a resalta cu e colaboracion aki ta yuda brinda hermentnan pa preveni violencia y fortifica conscientisacion na Aruba, pa cu tur hende muhe y mucha muhe por biba liber di violencia.