Hefe di Ambulance, Liderato Hoek:
*Nan ta unico acceso cu ambulance y brandweer tin
ORANJESTAD (AAN) –Liderato Hoek, Hefe di Servicio di Ambulance na ImSan, a comenta den un entrevista cu DIARIO, cu enberdad nos ta drentando den e dos ultimo fin weekendnan di carnaval, y te awo el a bay relativamente keto pa ambulance.
“Pero nos sa cu semper ta e ultimo dos fin di simannan ta esnan di mas pisa, pa servicio di ambulance. Nos ta drentando den e ultimo dos weekendnan, cu ta hopi druk pa ambulance y nos a pidi e publico pa duna nos nan cooperacion, pa haci nos trabao profesionalmente”, Liderato Hoek a señala, agregando cu e paradanan pabao di brug, cierto cruzadanan specificamente, por ehemplo esun di Fort Zoutman, ta hopi esencial pasobra e ta e unico acceso cu ambulance tin, hasta pa e otro banda di caminda cu ta e hotel, y no solamente pa ambulance pero tambe pa brandweer.
Hoek a indica cu tur aña Ambulance ta pidi pa laba e area aki habri, no bin bloki’e, no bin para y gewoon laga bo auto, pasobra e ta wordo getakel.
“El a reitera cu pueblo mester corda cu e ta e unico acceso pa e parada si un hende bira malo, of banda di caminda. Esaki ta e cruzadanan cu, strategicamente, nos por yega na persona.
Liderato Hoek a bisa cu hopi adulto mayor tin malesanan cronico, y e ta pidi nan pa tuma nan remedi na tempo, y mihor no consumi alcohol pasobra esaki cu remedi no ta bay hunto. Tambe, pa loke ta mucha, percura pa nan ta bon hidrata, pa bebe suficiente likido.
