Prome Minister Evelyn Wever Croes:
* Tambe a pone deadline traha presupuesto 2025
ORANJESTAD (AAN) – Minister Presidente, Evelyn Wever-Croes a yama un conferencia di prensa Diabierna, den cual el a duna di conoce cu e mainta aki tabata tin reunion di Conseho di Minister di Reino na Hulanda, y mainta trempan el a wordo informa door di Minister Plenipotenciario, di dos decision importante cu ta toca Aruba.
“E prome ta un noticia cu mi ta considera hopi bon, y esey cu Rijksministerraad a dicidi cu ta hala atras e Ley di RAft. RAft ta abreviacion pa Rijkswet Aruba financieel toezicht. Nos ta corda cu esaki tabata un di e condicionnan cu Hulanda a pone e tempo ey, pa por a yuda Aruba atravesa e pandemia, pero cu nos tabata sa desde principio cu no tabata un bon ley pa Aruba. Y for di e momento ey a negocia te cu nos a logra cu el a wordo kita for di mesa” Minister Presidente a señala.
El a sigui splica cu e di dos decision cu Conseho di Minister di Reino a tuma ta uno menos bon, pero cu ta pone Aruba na un deadline pa trata e presupuesto 2025, y e deadline aki ta 31 di Maart.
“Esaki ta algo cu mi ta considera menos bon, pasobra durante mi Gabinete, nos no a haya nos den un situacion asina cu bo por a evita, pero cu bo ta haya un tipo di instruccion di Rijksministerraad cu ta dunabo un dead line. Lamentablemente, durante e ultimo añanan nos a percura p’e presupuesto ta entrega na tempo, p’e wordo trata na tempo, pero e biaha aki nos ta cayendo laat”, e dignatario s señala.
LEY DI RAft:
E mandatario a retrocede su mes, un rato, na e tempo cu e pandemia a bati porta di Aruba, ora cu mester a cera frontera dia 16 di Maart, ya nos turistanan no por a drenta mas. “Ora tur hende mester a keda p’aden, shelter in place, toke di keda, ora nos tabata lucha pa salba bida di hende, y nos no tabata sa e embergadura di e pandemia, ni di e peligro di e virus, na e momento ey Aruba no tabata tin fondo mas, no tin placa mas ta drenta.
Nos a bati na porta di Hulanda. Hulanda a yuda nos 15 di Mei, cu cierto cantidad di placa, y despues na Juni tambe pero e ora ey nan a bisa nos cu despues di esey si, ‘nos ta duna boso placa solamente si boso bay di acuerdo cu dos ley di Reino: dos Rijkswet. Uno tabata e COHO cu tabata pa Curacao, Aruba y Sint Maarten y e RAft tabata pa Aruba so”, Premier Wever-Croes a señala.
Den otro articulo DIARIO ta elabora mas riba e tema aki cu Prome Minister a trece dilanti.
