AVP y FUTURO no por bolter base maneho financiero Wever-Croes
*Gobierno nobo mester tene na palabracionnan entre Aruba y Reino
*Mester sigui atende cu formacion Gobierno a base di palabracion CafT
ORANJESTAD (AAN) — Na momento cu Gobierno Evelyn Wever-Croes a keda encarga cu e maneho di Aruba, e situacion financiero di e pais tabata uno di e motibonan mas importante den confrontacionnan serio cu Reino.
Na 2014 a base di Statuut, Hulanda a wordo obliga pa bati na porta di Aruba, baha Mike Eman cu tabata Prome Ministro for di Fort Zoutman y habri porta pa un epoca nobo pa Aruba, cu tabata ya den estado di bancarota.
Compilacionnan di cifranan di cual DIARIO ta dispone, ta duna un bista cla di e forma cu Mike Eman a abusa di su estadia den Gobierno di Aruba, pa hiba un maneho destructivo completamente contra base legal di Aruba, riba tereno financiero.
Entrada di Gobierno Evelyn-Wever Croes a exigi un postura di responsabilidad gubernamental enorme, sigur ora e pandemia a destrui e prome plannan di un maneho financierpo nobo cu mester a scapa Aruba di e realidad cu Mike Eman a laga atras.
Intervencion di Reino a yega asina leu cu Aruba, cu ya tabata bou supervision di Reino Hulandes, mester a sigui atende cu un exigencia Hulandes pa introduccion di un Ley di Reino, conoci na Aruba como RAfT, pa reemplaza supervision basa riba un ley di Aruba.
Prome Ministro Evelyn Wever-Croes a bay contra e supervision financiero total di Aruba, cu si el a wordo introduci manera originalmente Reino Hulandes tabata kier, lo a deshaci hasta di na un forma serio den e autoridad di Parlamento como base di gobernacion di Pueblo di e pais.
Mientras e Comision di Supervision, CAFT a haci su entrada y tabata guia Aruba na un futuro nobo a base di un maneho responsabel cu Prome Ministro Evelyn Wever-Croes a hiba, Aruba a keda den negociacion riba e forma final di supervision, na cual Reino Hulandes a tene duro.
Ayera prueba a wordo duna dor di Reino Hulandes, di e tremendo trabou cu a wordo haci dor di Gobierno Evelyn Wever-Croes, loke a nifica cu Gobierno di Reino a bay di acuerdo pa no introduci e sistema di supervision pa medio un decreto di Gobierno di Reino pero pa yega na un formula diferente pa e supervision Hulandes.
Esaki a bira un logro grandi di reconocemento di bon trabou pa Gobierno saliente Evelyn Wever-Croes, pero manera DIARIO ya a adverti, tambe lo a bira e base pa e proximo Gobierno di Aruba atende cu gobernacion cu ta basa tambe riba uzo di placa di Pueblo.
Informantenan a mustra cu sin duda ayera Reino Hulandes a duna honor y merito na e maneho cu a wordo hiba pa Gobierno di Evelyn Wever-Croes.
Mientrastanto tambe a wordo confirma cu manera DIARIO semper a trece dilanti, mester duna continuacion na e maneho financieroi basico di Gobierno Wever-Croes, cu ta e motibo cu Hulanda a dicidi cu no mester bini cu supervision extremo pero por introduci un sistema cu ta aceptabel pa ambos pais pa garantisa cu nunca mas Aruba ta cay den e situacion cu a haci cu Gobierno di Reino mester a interferi den e maneho cu a wordo hiba pa Mike Eman.
Uno di e puntonan cu a bini claramente dilanti ayera tabata e hecho cu a wordo bisa cu presupuesto mester wordo entrega riba fecha stipula pa Reino, pero esaki ainda no a socede.
A surgi un intercambio entre Ministro di Finanza y Gerlien Croes cu awor ta presidi Parlamento, ya cu segun Gerlien Croes e documento no a wordo entrega na su persona manera e Ministro a bisa. DIARIO di otro banda a ricibi un carta cu ta duna prueba cu e documento a wordo manda pa Gerlien Croes.
Mientras ya por nota problema riba e forma cu maneho financiero lo por conoce cambio, e posicion Hulandes ayera tambe a mustra cu Hulanda no conoce cambio y cu e actitud positivo di Hulanda enfrente Aruba por cambia di Aruba no tene su mes na palabracionnan.
Manera ya bisa Hulanda ta asumi cu e Gobierno di Mike Eman ta tene su mes na tur palabracion cu tin entre Gobierno di Reino y Aruba.
Ta den e cuadro aki, basa riba e forma cu Gobierno Evelyn Wever-Croes a hiba un maneho di recuperacion financiero pa Aruba, Gobierno di Reino a bay di acuerdo pa honra e peticion di Wever-Croes y bini cu un areglo legal nobo cu ta reemplaza e Ley di Reino, cu tin un impacto enorme.
Segun infomantenan mester conclui, cu e maneho financiero di Gobierno nobo di Mike Eman, no por ta di acuerdo cu e maneho cu el a hiba den pasado pero mester ta basa riba e maneho responsabel, cu guia di CAFT, pa asina honra e bon gobernacion financiero pa cual Reino ta responsabel na Aruba.
Pues na su salida, Reino Hulandes ta duna credito y honor na e maneho cu a wordo hiba pa Prome Ministro Wever-Croes y cu mester keda refleha den e Gobierno di Mike Eman, cu actualmente ta priminti cielo y tera den formacion di un Gobierno nobo.
