Comerciantenan preocupa cu mas aumento di prijs riba consumo:
ORANJESTAD (AAN) – Den conferencia di prensa di Camara di Comercio (KvK), hunto cu Aruba Trade & Industry Association (ATIA) y Comerciantenan Uni Aruba (CUA), a mustra nan preocupacion cu mas aumento di prijs riba productonan di consumo, ta na caminda.
Francis Saladin, miembro di CUA a menciona cu ora di papia di comerciantenan, con nan ta mantene prijs, of ta pidi pa no subi prijs pa consumidor, etc., el a pone e restaurantnan como ehemplo.
Esaki den sentido cu restaurantnan no por a subi prijs di nan menu, pasobra hendenan no tin placa pa gasta. Kiermen e comerciantenan ey ya caba ta absorbiendo e gasto di aumento di prijs.
E mes ta un importado, y como tal, el a splica cu e producto su “cost prijs” cu e ta paga pa caha ta subi di 15 pa 20 dollar y e no por haci nada contra esey. E tin cu mantene su ganashi mas abao pa asina keda competitivo. Pero si e prijs cu e ta paga pe ta mas di locual e tabata bende e producto anteriormente, si e ta absorbe esey, ta perdida e tin. “Na dado momento, si mi ta hiba mi negoshi cu perdida, mi no por paga mi trahado y otro problema cu mi no por paga mi gastonan.
Dus, e no ta funciona asina ey. Manera mi colega di Camara di Comercio, Omar Tromp, a splica locual nos por haci ta, mirando cu e prijs ta bay subi mas, nos ta pidi gobierno yuda frena esaki un poco, door di baha e forma di calcula e invoerrechten, riba e totalidad di e producto cu e flete. Esey ta haci cu bo ta frena un poco su nivel di prijs”, Saladin a bisa, y señor Tromp a agrega cu nan ta bay pidi gobierno pa considera seriamente, nan ta hopi preocupa pa pueblo den e sentido aki.
