ORANJESTAD (AAN) – Abogado mr. Oomen di Nuñez a reacciona fuerte riba Procurador General (PG) kende a exigi pa awor condena Nuñez siendo cu den Promer Instancia el a wordo declara liber.
MINISTERIO PUBLICO TA MIDI CU DOS MIDI
Abogado mr. Oomen a bisa Hof cu den Promer Instancia a hiba defensa caba y reclama pakico Ministerio Publico no a persigui otronan cu a paga pa regla perrmiso. Na opinion di e abogado, esaki ta crea e impresion cu Ministerio Publico ta midi cu dos midi. Parce cu door cu Nuñez lo ta forma parti di e partido di Paul Croes, a haci esaki.
SACA COS FOR DI CONTEXTO
E abogado a mustra cu PG ta menciona cosnan cu den e sentencia di Nuñez no ta para. Pa loke ta yamada entre Nuñez y Paul Croes cu PG ta bisa, e combersacion tabata tocante 4 dispensacion di permiso. Nuñez tabatin 4 documento di peticion pa Paul firma. E abogado a mustra cu Nuñez no por corda kico a papia tanto aña pasa. El a mustra cu Nuñez no a papia nada di paga Paul pa regla permiso. E tabata cobra menos cu otronan pa regla nan permiso. No tin nada di cu Nuñez lo a papia di paga Paul pa regla permisonan. E abogado ta haya cu PG ta saca cos for di su contexto pa por pinta Nuñez como culpable.
Na opinion di mr. Oomen, PG a mustra cu Paul lo a haya riba su creditcard mas di 2 mil dollar deposita. E ta haya cu PG ta bay demasiado leu di ta interpreta cosnan robez pasobra Nuñez no a haci deposito. E lo ta otro hende. E abogado a mustra cu Paul a papia cu otro comerciante caminda eynan tabata papia di dollars. Con por ta cu Nuñez ta bay paga mucho mas na Paul cu loke e mes ta gana pa regla permiso!
COMPRONDE NOS CULTURA
Mr. Oomen a bisa Hof, cu Hues di Promer Instancia a mustra cu mester tene cuenta con hendenan na Aruba ta anda cu otro. E abogado ta referi aki na interpretacionnan completamente robez. El a remarca cu e Hulandes Europeo ta hopi diferente y ta hopi directo y pichiri. E Arubiano ta hopi mas pasivo y no ta reacciona directo.
E abogado ta haya cu Hof mester tene bon cuenta cu nos cultura, con nos hendenan ta anda cu otro y no ta manera ta pinta cu lo ta cumpra hende. El a remarca cu no ta manera Ministerio Publico ta pinta cu hopi cosnan no bon ta sosode riba nos isla. E abogado ta di opinion cu riba nos isla Aruba tin hopi cos bon ta sosode.
NO TIN NADA DI CUMPRA PAUL
E abogado ta haya cu no tin prueba contra Nuñez di a cumpra Paul Croes. E ta haya cu ta culpa Nuñez pasobra e lo ta forma parti di e partido di Paul. El a bisa Hof cu e 26 dianan sera a afecta Nuñez hopi. El a pidi Hof pa confirma e sentencia di Promer Instancia y declara Nuñez liber.
